تهييس الجمعاوية ايام النتيجة

تررررررن تررررررررن تررررررررررن

الام : الو

أحمد : الو ,,, ازيك يا طنط عامله ايه

الام : الحمد لله و انته عامل ايه يا ابنى

أحمد : تمام الحمد لله ممكن اكلم محمد

الام : و الله محمد نايم دلوقتى بس لو فى حاجه ضرورى ممكن اقولهالو ...

و لا تحب اصحيهولك؟ ؟

أحمد : ياريت يا طنط تصحيه معلش يعنى

الام : حاضر يا بنى

يا محمد يا محمد كلم صحبك أحمد على التليفون ...

محمد : حاضر يا ماما انا كونت قايم اصلا

محمد : الو ,,, مين معايا

أحمد : كونداليزا رايس

محمد : يا بنت الايه و مال صوتك احلو كده ليه

أحمد : يا عم انا أحمد انته هاتستظرف على الصبح

محمد : بس احنا المغرب دلوقتى يا خفة

أحمد : تصدق يلا انا جزمه اصلا ان انا اتصلت بيك علشان اقولك انك اتزفت نجحت

محمد : طيب ما انا عارف

أحمد : عارف ايه ,,, عارف انك نجحت

محمد : لا ,,, عارف انك جزمه

أحمد : ايوه يا عم هزر هزر ما هو الناجح يرفع ايدو

محمد : اشمعنه

أحمد : انته هاتخشلى قافيه

محمد : خلاص يا عم ,,, المهم التقدير ,,, هاه التقدير ايه

أحمد : مش فاهمك الحقيقه ,,, ممكن توضحلى النقطه دى

محمد : بقولك التقدير انا جبت تقدير ايه

أحمد : يا عم انته هاتعيش الدور دا انته لولا درجات الرافه كانت بقت تالت سنه ليك فى رابعه

محمد : يا عم انته هاتزلنى

أحمد : عم ايه ,,, انته شايفنى واقف تحت بيتكم لابس الجلابيه و بقول مسكره يا جوافه

محمد : مكنتش اعرف ياد ان كليتنا بطلع ناس بالمرح و الخفه دى كلها

أحمد : يلا معلش عيد الام بقه

محمد : بلا عيد الام بلا عيد العمال المهم انت عملت ايه

أحمد : انا الحمد لله طلعت بجيد

محمد : و هو احنا عندنا ماده اسمها جيد ,,, لا حول و لا قوه الا بالله ,,, يلا ربنا معاك

أحمد : يخرب بيت الزفت الى بتشربو و مطينلك دماغك ده انا جبت تقدير جيد ياض

محمد : طيب كويس ربنا يوفقك و مقبول من جيد مش هاتفرق

أحمد : على رايك

محمد : هاه هانعمل ايه دلوقتى

أحمد : الحقيقه مش عارف ,,, محتار بين بيض بالبسطرمه و فول بالسجق

محمد : يا راجل ,,, مش تقول انك محتار كده
انا اقولك بص انته تعمل عبيط

أحمد : خلاص يا عم ,,, انا اسف

محمد : اسفك مش مقبول ,,, اسفك جيد جدا
بس بجد هانعمل ايه بعد ما اخدنا البكالوريوس

أحمد : هانبدا بقه رحلة البحث على شغل كويس علشان ناكل عيش

محمد : و انتو معندكوش عيش فى البيت و لا ايه

أحمد : لا معندناش و مين قالك ان احنا معندناش

محمد : لا ابدا جالى هاتف

أحمد : و جبتو على كام

محمد : لا هو اتمختر و جالى لوحده

أحمد : بس انا بجد مخنوق اوى من حكايه الشغل دى يا محمد

محمد : هه ,,, يارب

أحمد : يارب ياعم ,,, بس انته عارف الوسايط و الكلام ده مالى البلد

محمد : تحيا جمهوريه مصر العربيه يا عم
ما تخفش يا عم ربنا هايفرجها انشاء الله

أحمد : و الله يا محمد ان لولا كلامنا و تهريجنا مع بعض فى بلدنا دى كان الحال رسى بينا على حاجتين
يا اما كنا ولعنا فى نفسنا
يا اما كان اتولع فينا

محمد : يا عم هيس تعيش كويس

أحمد : قشطه يا بوب و ناوى تعمل ايه دلوقت

محمد : هقضيها فساد

أحمد : قشطه شكلك هتكمل نوم صح ؟؟؟

محمد : حافظنى ياض و الله انت برنس

أحمد : يا عم انت اللى بوب روح غور بقى و نام و اشوف وشك بكره

محمد : يلا فى ستين داهيه يا صاحبى

أحمد : الله يحرقك يا حبى تصبح على ستين نيله

محمد : و انت من اهله يا فقر

حلوة النهاية هههههههههههههه
مش احنا
"عايزة حاجة؟ ... مع السلامة"
يلا عقبال النتيجة بتاعتنا تظهر

شكراً يا بسمة

"محمد : يا عم هيس تعيش كويس

أحمد : قشطه يا بوب و ناوى تعمل ايه دلوقت

محمد : هقضيها فساد

أحمد : قشطه شكلك هتكمل نوم صح ؟؟؟

محمد : حافظنى ياض و الله انت برنس

أحمد : يا عم انت اللى بوب روح غور بقى و نام و اشوف وشك بكره

محمد : يلا فى ستين داهيه يا صاحبى

أحمد : الله يحرقك يا حبى تصبح على ستين نيله

محمد : و انت من اهله يا فقر"

شكلهم بيحبوا بعض اوي يا سارة
اة تيجي نجربها مرة دي يا سارة بدل التقليدي بتاعنا

عايزة حاجة؟ لا شكرا
مع السلامة.. سلام

مش دة اروش بردو؟؟ ههههه

نورتي الموضوع يا سارة بمرورك