ما رأيكم في مناهجنا التعليمية؟

السلام عليكم ورحمة الله

ما هي مميزات المناهج التعليمية؟ وما هي سلبياتها وعيوبها؟
الموضوع مفتوح للنقاش حول رأينا - كطلاب- حول ما ندرسه ..
أتمنى يكون فيه تفاعل إن شاء الله ..

اكيييد التعليم بتاعنا مش عايز اقول فاشل بس مش منظم يعنى بنلاقى غلطات كتير زائد ان فى الاحياء الفصل الاخير مفيش غير مصر اللى بدرسه واكيد غير كده كتيييير يعنى بالمعنى فى نظرى مش منظم زى ما يكون اللى بيحطوا المنهج كل واحد منهم عايز يحط على مزاجه اللى هو عايزه يتحط الاول ومش اى حاجة تانية فأكييد هنلاقى غلطات كتير >> والكلام ده طبعا غير النسب اللى ملهاش اى فائدة وكمان بيبقى فيها حاجت غلط كتيير على ما اعتقد ان السلبيات عندنا اكتر من المميزات والمفروض يبقى العكس !!

Mostafa كتب:

اكيييد التعليم بتاعنا مش عايز اقول فاشل بس مش منظم يعنى بنلاقى غلطات كتير زائد ان فى الاحياء الفصل الاخير مفيش غير مصر اللى بدرسه واكيد غير كده كتيييير يعنى بالمعنى فى نظرى مش منظم زى ما يكون اللى بيحطوا المنهج كل واحد منهم عايز يحط على مزاجه اللى هو عايزه يتحط الاول ومش اى حاجة تانية فأكييد هنلاقى غلطات كتير >> والكلام ده طبعا غير النسب اللى ملهاش اى فائدة وكمان بيبقى فيها حاجت غلط كتيير على ما اعتقد ان السلبيات عندنا اكتر من المميزات والمفروض يبقى العكس !!

فعلاً غير منظم
وبالنسبة إلى الأحياء:
والفصل الأخير مزعج لأن - أظن - نظرية مثل نظرية "داروين" مخالفة لمعتقداتنا فالنظرية وبقية الفصل "مقصوص" نوعاً ما وفي معلومات مذكورة من غير ما نعرف أصلها من السنوات السابقة (مش في الأحياء بس في معظم المواد)
بالإضافة لكدة قرأت على بعض المواقع العلمية بعض المعلومات مناقضة للي بتدرس لكن لسة متأكدتش من صحتهم
والفصل قبل الأخير في معلومات فيه خطأ والصح بتاعها في منهج 5 ابتدائي (المنهج الجديد) ومع ذلك لسة المنهج القديم بأخطائه يدرس لنا

أما الجغرافيا والنسب المفروض فعلاً ميطلبش مننا حفظها لأنها مش بتفيد بالعكس بتزيد العبء على الطلاب اللي مطلوب منهم مواد كثير ثانية مع الجغرافيا وتستهلك وقت كبير جداً للحفظ -إن حفظت-

شكراً على المرور الإيجابي

و رأيي أيضاً إن المناهج بشكل عام كمها كبير جداً بالنسبة لوقت الترم فبالتالي الطالب بيبقى منهمك في مذاكرتهم ، مش غلط طبعاً المذاكرة لكن أقصد إن مش بيكون فيه وقت ولو بسيط للأنشطة المفيدة والإبداع زي الأبحاث (بمعناها الحقيقي) أو مشروعات متعلقة بالمناهج (زي الدول المتقدمة )

وأكثر حاجة تزعج فعلاً إن المناهج بتشجع على الحفظ أكثر من الفهم وحتى الامتحانات بتيجي على هذا الأساس بدل ما تختبر فهم الطلاب وبالتالي تشجع الطلاب أكثر على الحفـــظ
و أبسط دليل ؛ امتحان الهندسة الأخير ، مقصدش (بجد) إن اللي معرفش السؤال مش شاطر مثلاً لكن اللي حصل قدامي إن (بعض) الطلاب المتفوقين كانوا معندهمش ثقة في نفسهم أو في قدراتهم فتوتروا ومفكروش كويس ،(( لأن كلنا متعودين كل سنة الامتحانات تيجي بالنص من كتاب المدرسة..))

دة غير إن في أخطاء (زي ما ذكر فوق) في بعض المواد ، والسنة اللي فاتت في 3 إعدادي :

سارة أيمن كتب:

دي بئا يا جماعة ... مصييببة (مش حاجة طريفة أو حاجة لفتت انتباهي)

في الدرس الأول في القراءة للصف الثالث الإعدادي الفصل الدراسي الثاني
اللي هو (لحظات غيرت التاريخ)

في حديث (تفكر ساعة خير من عبادة ألف عام)

أولا المستر قال الحديث دة مش صحيح

أنا حاولت أبحث عنه أو حديث بمعناه في موقع درر

أولاً : بنفس اللفظ ... مفيش أي نتائج للبحث

ثانياً: الأحاديث المشابهة له:

1 - تفكر ساعة خير من عبادة ستين سنة .
الراوي: أبو هريرة المحدث: العراقي - المصدر: تخريج الإحياء - الصفحة أو الرقم: 5/161
خلاصة حكم المحدث: إسناده ضعيف وبلفظ: ثمانين سنة وإسناده ضعيف جدا

- تفكر ساعة خير من عبادة سنة
الراوي: - المحدث: ملا علي قاري - المصدر: الأسرار المرفوعة - الصفحة أو الرقم: 175
خلاصة حكم المحدث: قيل لا أصل له أو بأصله موضوع

3 - تفكر ساعة خير من عبادة ستين سنة
الراوي: أبو هريرة المحدث: السفاريني الحنبلي - المصدر: شرح ثلاثيات المسند - الصفحة أو الرقم: 1/557
خلاصة حكم المحدث: إسناده واه بل موضوع

4 - تفكر ساعة خير من عبادة سنة
الراوي: - المحدث: القاوقجي - المصدر: اللؤلؤ المرصوع - الصفحة أو الرقم: 66
خلاصة حكم المحدث: من كلام السلف



المصدر: موقع الدرر السنية

ازاي يدرسوه لينا في العربي من غير ما يتأكدوا من صحته ؟؟؟!!!!!!!!!!

دة غير "تدمير" منهج اللغة العربية (رأيي الشخصي) السنة اللي فاتت وكانت الدروس غريبة ، مثلاً :
سمكة تنصح أبنائها ، كن إيجابياً لطلاب في 3 إعدادي
وبعد كدة نيجي في أولى ثانوي فجأة نلاقي نصوص قوية وأطب و بلاغة ، ... !
حاجة جميلة إن منهج العربي يكون قوي السنة دي لكن المفروض كان يكون في تمهيد !
والنصوص بتزعجني حاجة في مظاهر الجمال والتعليق فيها لما كانوا يقولوا حاجات احنا لسة مدرسنهاش زي مثلاً "الإطناب" (مش مقرر علينا) في نص "رسالة أم إلى ابنتها" و مثلاً الاستعارات بأنواعها وهي لسة مقررة علينا الترم دة
كان يبقى أحسن لو درسوا لنا الحاجات دي مثلاً قبل ما يقولوها لنا من غير ما نكون فاهمينها

ودليل آخر على تشجيع الطلاب على الحفظ إن أنا فاكرة في أولى إعدادي كان في امتحان اللغة العربية في سؤال القصة لما لقينا سؤال بيسأل عن عقبة بن نافع المعركة كانت في اول النهار ولا آخر النهار ولا الصباح تقريباً !!
القصة كلها بأحداثها المهمة بنتائجهم وكل حاجة متسألش عنا لكن اتسألنا السؤال دة ..

و بالنسبة لأولى ثانوي ، الترم الأول كان كم مادة التاريخ كبير جداً والتواريخ كثيرة ليه متبقاش المادة بالشكل دة لما يختار الطالب انه يدرسها فقط ، المفروض أولى ثانوي مفهاش اتجاه معين (أدبي + علمي) ، يعني اللي هيختار أدبي أو يختار كلية يدرس فيها تاريخ.. أما في أولى ثانوي يخففوها شوية لأنها كانت مادة " ثقيلة" فعلاً ومعاها مواد ثانية كثير

اقتباس :

و بالنسبة لأولى ثانوي ، الترم الأول كان كم مادة التاريخ كبير جداً والتواريخ كثيرة ليه متبقاش المادة بالشكل دة لما يختار الطالب انه يدرسها فقط ، المفروض أولى ثانوي مفهاش اتجاه معين (أدبي + علمي) ، يعني اللي هيختار أدبي أو يختار كلية يدرس فيها تاريخ.. أما في أولى ثانوي يخففوها شوية لأنها كانت مادة " ثقيلة" فعلاً ومعاها مواد ثانية كثير

اكيد كلامك صحيح لأن لو واحد زيى مثلا الحفظ الكتير بيضايقنى وانا بصراحة بحب المواد اللى فيها فهم اكتر واكيد المواد اللى فيها فهم فيها نسبة حفظ ماشى لكن بتكون مرتبطة بالفهم وكده الواحد يذاكر وهو مرتاح البال ليه ميخففوش المواد الادبيه للى عايز اتجاه علمى مثلا زى الجغرافيا فعلا الواحد كان لازما يذاكرها كل اسبوع على الاقل علشان مينساش اللى فيها من نسب او كلام كتير فى نظرى لا فائدة له وطبعا ده يخلى الواحد يكره انه يذاكر ويشتت تفكيره وبالتالى ميحققش اللى هو عايزه وطبعا غير الجغرافيا الفلسفة اللى كل كلامها بحس انه متناقض مش عارف ليه ؟! والاجابات فيها متشابهه جدا والمشكلة ان السؤال بيأتى بأكتر من صيغة وهو ده اللى حصل فى امتحان الفلسفة الترم اللى فاتت مثلا عن قوانين الفكر الارسطى مجاش السؤال بالنص اللى احنا عارفينه لا جيه بنص تانى خالص حتى مس مروة دخلت ووضحته علشان معظمنا مكناش فاهمينه هو يقصد ايه بالظبط ؟!!

اقتباس :

وأكثر حاجة تزعج فعلاً إن المناهج بتشجع على الحفظ أكثر من الفهم وحتى الامتحانات بتيجي على هذا الأساس بدل ما تختبر فهم الطلاب وبالتالي تشجع الطلاب أكثر على الحفـــظ
و أبسط دليل ؛ امتحان الهندسة الأخير ، مقصدش (بجد) إن اللي معرفش السؤال مش شاطر مثلاً لكن اللي حصل قدامي إن (بعض) الطلاب المتفوقين كانوا معندهمش ثقة في نفسهم أو في قدراتهم فتوتروا ومفكروش كويس ،(( لأن كلنا متعودين كل سنة الامتحانات تيجي بالنص من كتاب المدرسة..))

اكيييد مينفعش احفظ شئ الا لما افهمه لكن المشكلة ان فى حاجات لازم تتحفظ كده من غير ما تتفهم لأنهم بيحطوا لينا فى المناهج يإما حاجات مش لسننا او حاجات اقل من سننا وطبعا ده كله غير الاخطاء الكبيرة والغريبة اللى فى الكتب طبعا زى الحديث ده :

اقتباس :

سارة أيمن كتب:
دي بئا يا جماعة ... مصييببة (مش حاجة طريفة أو حاجة لفتت انتباهي)

في الدرس الأول في القراءة للصف الثالث الإعدادي الفصل الدراسي الثاني
اللي هو (لحظات غيرت التاريخ)

في حديث (تفكر ساعة خير من عبادة ألف عام)

أولا المستر قال الحديث دة مش صحيح

أنا حاولت أبحث عنه أو حديث بمعناه في موقع درر

أولاً : بنفس اللفظ ... مفيش أي نتائج للبحث

ثانياً: الأحاديث المشابهة له:

1 - تفكر ساعة خير من عبادة ستين سنة .
الراوي: أبو هريرة المحدث: العراقي - المصدر: تخريج الإحياء - الصفحة أو الرقم: 5/161
خلاصة حكم المحدث: إسناده ضعيف وبلفظ: ثمانين سنة وإسناده ضعيف جدا

- تفكر ساعة خير من عبادة سنة
الراوي: - المحدث: ملا علي قاري - المصدر: الأسرار المرفوعة - الصفحة أو الرقم: 175
خلاصة حكم المحدث: قيل لا أصل له أو بأصله موضوع

3 - تفكر ساعة خير من عبادة ستين سنة
الراوي: أبو هريرة المحدث: السفاريني الحنبلي - المصدر: شرح ثلاثيات المسند - الصفحة أو الرقم: 1/557
خلاصة حكم المحدث: إسناده واه بل موضوع

4 - تفكر ساعة خير من عبادة سنة
الراوي: - المحدث: القاوقجي - المصدر: اللؤلؤ المرصوع - الصفحة أو الرقم: 66
خلاصة حكم المحدث: من كلام السلف



المصدر: موقع الدرر السنية

ازاي يدرسوه لينا في العربي من غير ما يتأكدوا من صحته ؟؟؟!!!!!!!!!!

ياريت فعلا الفلوس اللى بتتصرف فى الدولة على حاجات الواحد لما بيسمعها بيستغرب ان الفلوس دى بتضيع هدرا كده من غير ما نستفيد بيها ليه ميخلوش التعليم هو Number 1 لأنه بيه يا بتتقدم الدول يا اما بتتأخر وبتخرب كمان !!

"ياريت فعلا الفلوس اللى بتتصرف فى الدولة على حاجات الواحد لما بيسمعها بيستغرب ان الفلوس دى بتضيع هدرا كده من غير ما نستفيد بيها ليه ميخلوش التعليم هو Number 1 لأنه بيه يا بتتقدم الدول يا اما بتتأخر وبتخرب كمان !!"
أنا موافقة جدا علي الموضوع دة.. لاننا مؤخرا سمعنا عن تجهيز مستشفي طرة بمبلغ كبير جدا عشان ينقلوا مبارك فيها.. ومن دة أمثلة كتير.. كلها بتدل علي ان مافيش اي تقدير لان الفلوس دي ممكن تعمل حاجة!.. بس بتروح هدر علي حاجات مش هتفيد الدولة باي شئ..


المناهج المصرية...

أولا.. بتقتل روح الابتكار والتفكير.. لان اغلبها بيعتمد علي الحفظ والتلقين مش علي الفهم.. في المواد العلمية والادبية علي حد سواء..
طبعا الادبية فيها كمية معلومات كبيرة تتحفظ ونسب وارقام مالهاش اي لازمة! يعني الطالب ايه هيستفيده لما يعرف عدد الابقار في الهند مثلا؟ ومن الارقام دي كتير.. مساحات ونسب واعداد وحاجات الطالب مش هيعرف يحفظها اصلا لانها كتير جدا وحتي لو حفظ شوية منها هينساها بعد الامتحان علي طول! فالواحد بيحشي دماغه بالحاجات اللي مالهاش لازمة دي ويدخل يكبها في الامتحان ويبقي ضيع مجهود ووقت في جزء من سنة في عمره علي حفظ حاجات مش هتفيده باي شكل..
أما المواد العلمية فعن طريق الامتحانات.. اللي كتير بتتنقل من كتاب المدرسة بالنص بالارقام.. زي ما شفنا بالذات في امتحان الرياضيات في 3 اعدادي مثلا.. نفس المسألة بنفس الأرقام.. وكل الامتحان افكار مكررة ومعادة.. وما بيجيش في الامتحان سؤال فيه فكرة جديدة مثلا ولو حتي كانت بسيطة لكن علي الاقل يبقي الواحد شغل دماغه وعمل حاجة!! (باستثناء امتحان التيرم الاول السنة دي في الهندسة لان فيه سؤال جه فيه فكرة)..

ثانيا.. عدم التنظيم.. من حيث ان الطالب بيدرس مثلا حاجات وعليه ان "يحفظها" لانه لسة ما درسش تفسيرها.. مثال علي كدة العربي زي ما ذكرتي يا سارة.. بندرس في مظاهر الجمال حاجات احنا ما خدناهاش وبنتسئل فيها والمفروض "نحفظها" قبل ما ندرسها ونفهمها.. ففيها ايه مثلا لو البلاغة كلها تدرس في بداية السنة ولو حتي كان بشكل موجز الي حد ما.. او حتي تدرس بشكل موجز في تالتة اعدادي عشان يكون الطالب فاهم اللي هو بيقوله لحد ما يدرسها بتوسع اكبر.. وفيه اكيد امثلة تانية.. وكمان من حيث ان السنوات والمراحل ما بتمهدش لبعض.. وزي ما قلتي يا سارة مثلا الصدمة اللي الطالب بياخدها لما بيدخل اولي ثانوي.. بعد ما كان بيدرس مواضيع تليق بـابتدائي في 3 اعدادي بدل ما يدرس دروس كويسة تمهده للاددب والنصوص والقراءة في اولي ثانوي.. والدروس اللي بتليق بابتدائي دي كانت تحسيها بتستهتر بمستوي عقل طالب في 3 اعدادي.. لما نبقي بندرس ما هو اقرب لنشيد (مش شعر) .. ودرس فيه حيوانات بتتكلم واستهتار مافيش بعده بصراحة..

ثالثا.. الاخطاء والتضارب في المعلومات.. وانتي وضحتي النقطة دي يا سارة وكفاية الخطأ الفادح بتاع الحديث دة..

رابعا.. اللغااااااااات!! .. المشاكل اللي في الكتب المترجمة او الامتحانات مشاكل جسيمة بصراحة.. والموضوع كان هيبقي مقبول لو كان علي مستوي مدرستنا مثلا! لكن الموضوع دة مش بس علي مستوي مدرستنا وادارتنا ومحافظتنا لكن هو علي مستوي الجمهورية.. لان فيه طلبة في ثانوية عامة اشتكوا من اخطاء في ترجمة امتحان ما... وكمان الكتب المترجمة دي بتبقي علي مستوي الجمهوية وبصراحة الاخطاء مخجلة.. احيانا اخطاء بالمعلومات نفسها او ترجمة "حرفية" واخطاء في ترجمة المصطلحات العلمية.. كلها بتجبر الطالب اللي في لغات انه يجيب كتاب نسخة عربي من المادة المترجمة وكمان نسخة عربي من الامتحان عشان اخطاء الترجمة اللي في الامتحانات..

خامسا.. دراسة مواد مالهاش لازمة! مثلا مادة زي التربية الوطنية دي.. هي ايه لازمتها؟! كل الكلام اللي فيها مدروس مسبقا في التاريخ او الجغرافيا.. ولو كان الهدف منها هو اعلاء روح الوطنية عند الطلاب فهي ما بتعملش كدة.. هي مجرد مادة مكررة من الـ"دراسات" بس بشكل أخف ومش بيتضاف للمجموع!..

سادسا.. قتل الجمال اللي في المادة ومعناها.. انهاردة مس مروة مدرسة الفلسفة.. قالت ان منهج الفلسفة هو هواه من ساعة ما هي كانت في المدرسة! فهي اتخرجت ودخلت كلية واشتغلت ودة كله المنهج ثابت.. وهي شايفة انها كانت بتدرس حاجات "جميلة" في الفلسفة وممتعة في الكلية .. لكن اللي بيدرسوهلنا دة حاجات مملة.. و قالت ان المفروض الفلسفة تبقي مواكبة للتطور اللي احنا فيه ومنهجها يتغير بشكل منتظم..
وكمان اتكلمنا معاها علي موضوع اسئلة "ما رأيك؟" .. السؤال بيقول ما رأيك لكن في الاخر لازم تلتزم بـ"رأي الكتاب" و التعليل اللي في الكتاب.. وقالت انها كان نفسها تبقي المادة اللي بيدرسوهالنا بتساعد علي التفكير والابتكار لكن دة ما بيحصلش.. فالمس اول كلمة قالتها في شرح الفلسفة (كانت اول حصة انهاردة) ان كل واحد ليه فلسفته في الحياة.. المقصود بفلسفته هنا وجهة نظره.. فالمفروض لو عايزين تبقي المادة بتفعل تفكير الطالب تبقي بتقديم وجهة نظر كل طالب مش وجهة نظر الكتاب!!

سابعا.. القصص المبالغ فيها التي ليست موضوعية.. زي شجرة الدر مثلا.. بيبقي الكاتب متيم بالشخصية اللي بيكتب عنها لدرجة انه "قص" الجزء الاخير من حياتها لان نهايتها كانت وحشة.. وبالغ في كل افعالها وصورها انها ملاك رغم ان الشخصية الحقيقية لو حد قرأ عنها بحياد هيعرف انها عملت حاجات كتير مش كويسة..

ثامنا.. أنا عرفت ان الواجبات في أمريكا مش زي هنا كدة.. الواجبات بتاعتنا دي مجرد نوع من انواع الواجبات اللي عندهم.. الواجبات بتاعتنا دي اللي هي بتتسمي بـ Worksheet مثلا اللي هو اسئلة ونحلها.. لكن هناك فيه انواع تانية زي: مشاريع projects وتقارير reports و tasks او مهام بتبقي مطلوبة منهم زي قراءة كتاب في يوم معين مثلا.. وعندهم كتابة مقال عن كذا مثلا.. وعمل ابحاث.. وحاجات تانية بصراحة هتبقي ممتعة وهتثقف الواحد!

تاسعا.. التكديس في المناهج اللي بيخلي الانسان يودع هوايته طول فترة الدراسة لان مافيش اي وقت يمارس اي نشاط او هواية عشان طول الوقت وراه مذاكرة..


بصراحة لسة فيه حاجات تانية كتير!! وانا زهقت!
دول علي سبيل المثال وليس القصر..

شكرا علي الموضوع

اكيد كلامك صحيح لأن لو واحد زيى مثلا الحفظ الكتير بيضايقنى وانا بصراحة بحب المواد اللى فيها فهم اكتر واكيد المواد اللى فيها فهم فيها نسبة حفظ ماشى لكن بتكون مرتبطة بالفهم وكده الواحد يذاكر وهو مرتاح البال ليه ميخففوش المواد الادبيه للى عايز اتجاه علمى مثلا زى الجغرافيا فعلا الواحد كان لازما يذاكرها كل اسبوع على الاقل علشان مينساش اللى فيها من نسب او كلام كتير فى نظرى لا فائدة له وطبعا ده يخلى الواحد يكره انه يذاكر ويشتت تفكيره وبالتالى ميحققش اللى هو عايزه وطبعا غير الجغرافيا الفلسفة اللى كل كلامها بحس انه متناقض مش عارف ليه ؟! والاجابات فيها متشابهه جدا والمشكلة ان السؤال بيأتى بأكتر من صيغة وهو ده اللى حصل فى امتحان الفلسفة الترم اللى فاتت مثلا عن قوانين الفكر الارسطى مجاش السؤال بالنص اللى احنا عارفينه لا جيه بنص تانى خالص حتى مس مروة دخلت ووضحته علشان معظمنا مكناش فاهمينه هو يقصد ايه بالظبط ؟!!


لسة مشفتش الفلسفة علشان أحكم عليها ..
لكن مفيش مشكلة لو سؤال بأكثر من صيغة؟



اكيييد مينفعش احفظ شئ الا لما افهمه لكن المشكلة ان فى حاجات لازم تتحفظ كده من غير ما تتفهم لأنهم بيحطوا لينا فى المناهج يإما حاجات مش لسننا او حاجات اقل من سننا وطبعا ده كله غير الاخطاء الكبيرة والغريبة اللى فى الكتب طبعا زى الحديث ده :


تمام ، فعلاً مفيش حاجة تتحفظ قبل ما تتفهم لكن قصدي في النقطة دي كان إن الرياضة مينفعش تتحفظ أفكار المسائل بتاعتها لدرجة إن لما ييجي سؤال جديد بعض الناس تتصدم

وفعلاً ساعات الواحد بيضطر للحفظ وخلاص لما تكون أخطاء أو تناقضات أو حاجات لسة مدرسناش أسبابها ..


ياريت فعلا الفلوس اللى بتتصرف فى الدولة على حاجات الواحد لما بيسمعها بيستغرب ان الفلوس دى بتضيع هدرا كده من غير ما نستفيد بيها ليه ميخلوش التعليم هو Number 1 لأنه بيه يا بتتقدم الدول يا اما بتتأخر وبتخرب كمان !!

وليه تتصرف على التعلبم؟ مفيش مسلسلات وأفلام محتاجة مليارات؟؟؟! مفيش رياضة محتاجة ملايين؟!! (وياريتهم بيهتموا بالرياضة حتى للشباب وخصوصاً الرياضات التانية غير كرة القدم)

العلماء مش بيلاقوا أي دعم من الدولة علشان يعملوا أي مشروع علمي (زي محاولات أحمد زويل أيام النظام السابق انه يعمل المدينة وطبعاً فشلت)

حتى العقول النابغة في مصر مش بتلاقي أي اهتمام أو دعم ومش بينجحوا إلا لو هاجروا في أي دولة ثانية

المخترعين قرأت اخبار كثيـــــــــــــــر جداً إن مش بيرضوا يدوهم براءات الاختراع حتى

أي حاجة فيها إبداع أو تفكير كانوا بيقتلوها ويدمروها !

أي دولة ناجحة فعلاً لازم تخصص ميزانية معقولة للتعليم وتخليه من أهم أولياتها علشان تفضل ناجحة

جميل:

شكراً على مرورك الإيجابي يا بسمة
أنا كنت عاملة حسابي أرد بس مضطرة أقوم دلوقتي
لي عودة إن شاء الله
وشكراً على مشاركتك ^^

اقتباس :

لكن مفيش مشكلة لو سؤال بأكثر من صيغة؟

اكيد مفيش مشكلة وده بيشغل التفكير لكن لما انا احفظ ان قوانين الفكر الارسطية ملهاش اسم غير قوانين الفكر الارسطية وييجى فى الامتحان قوانين الفكر الاساسية احنا كنا عايزين نعرف هو يقصد قوانين ارسطو ولا قوانين تانية لأن فى غير قوانين ارسطو فى المنهج ..

اقتباس :

خامسا.. دراسة مواد مالهاش لازمة! مثلا مادة زي التربية الوطنية دي.. هي ايه لازمتها؟! كل الكلام اللي فيها مدروس مسبقا في التاريخ او الجغرافيا.. ولو كان الهدف منها هو اعلاء روح الوطنية عند الطلاب فهي ما بتعملش كدة.. هي مجرد مادة مكررة من الـ"دراسات" بس بشكل أخف ومش بيتضاف للمجموع!..

الحكاية دى سألنا فيها مستر محمد عبد الفتاح قالنا انه كان مضايق لما قالوا له انه يدرسها لأنها مادة مملة كله كلام درسناه قبل كده يمكن يكون فى جديد لكن فى نظرى متفرضش على واحد انه يعرفها وهو اصلا ميولة علمية
فى ناس بتحب تدرسها وفى ناس بتتعقد لما بتتدرسها !!

اقتباس :

اكيد مفيش مشكلة وده بيشغل التفكير لكن لما انا احفظ ان قوانين الفكر الارسطية ملهاش اسم غير قوانين الفكر الارسطية وييجى فى الامتحان قوانين الفكر الاساسية احنا كنا عايزين نعرف هو يقصد قوانين ارسطو ولا قوانين تانية لأن فى غير قوانين ارسطو فى المنهج ..

إن كان كدة فهي مشكلة فعلاً
وشكراً على التوضيح

اقتباس :

أولا.. بتقتل روح الابتكار والتفكير.. لان اغلبها بيعتمد علي الحفظ والتلقين مش علي الفهم.. في المواد العلمية والادبية علي حد سواء..
طبعا الادبية فيها كمية معلومات كبيرة تتحفظ ونسب وارقام مالهاش اي لازمة! يعني الطالب ايه هيستفيده لما يعرف عدد الابقار في الهند مثلا؟ ومن الارقام دي كتير.. مساحات ونسب واعداد وحاجات الطالب مش هيعرف يحفظها اصلا لانها كتير جدا وحتي لو حفظ شوية منها هينساها بعد الامتحان علي طول! فالواحد بيحشي دماغه بالحاجات اللي مالهاش لازمة دي ويدخل يكبها في الامتحان ويبقي ضيع مجهود ووقت في جزء من سنة في عمره علي حفظ حاجات مش هتفيده باي شكل..
أما المواد العلمية فعن طريق الامتحانات.. اللي كتير بتتنقل من كتاب المدرسة بالنص بالارقام.. زي ما شفنا بالذات في امتحان الرياضيات في 3 اعدادي مثلا.. نفس المسألة بنفس الأرقام.. وكل الامتحان افكار مكررة ومعادة.. وما بيجيش في الامتحان سؤال فيه فكرة جديدة مثلا ولو حتي كانت بسيطة لكن علي الاقل يبقي الواحد شغل دماغه وعمل حاجة!! (باستثناء امتحان التيرم الاول السنة دي في الهندسة لان فيه سؤال جه فيه فكرة)..

هاهاها ، الأول مثال كام بقرة في الهند لسة قايلاه لماما النهاردة الصبح علشان أعبر عن ضيقي ! xDDDDDDDDDDD
موافقاكي جداً ، السنة اللي فاتت بعد امتحان الدراسات كل الاحصائيات نسيتها تمامـــاً ! ايييييييييييييييه فائدة إن الواحد يحفظ علشان الامتحان فقط؟! لكن مين يسمعنا؟؟؟؟؟؟
فعلاً جداً ، امتحانات 3 إعدادي كانت عجيبة جداً ، ومش الرياضة بس العلوم كمان كانت كل الأسئلة من كتاب المدرسة :/ عمرهم ما يجيبوا حاجة فيها تفكير وإلا تحصل كارثة ://

اقتباس :

ثانيا.. عدم التنظيم.. من حيث ان الطالب بيدرس مثلا حاجات وعليه ان "يحفظها" لانه لسة ما درسش تفسيرها.. مثال علي كدة العربي زي ما ذكرتي يا سارة.. بندرس في مظاهر الجمال حاجات احنا ما خدناهاش وبنتسئل فيها والمفروض "نحفظها" قبل ما ندرسها ونفهمها.. ففيها ايه مثلا لو البلاغة كلها تدرس في بداية السنة ولو حتي كان بشكل موجز الي حد ما.. او حتي تدرس بشكل موجز في تالتة اعدادي عشان يكون الطالب فاهم اللي هو بيقوله لحد ما يدرسها بتوسع اكبر.. وفيه اكيد امثلة تانية.. وكمان من حيث ان السنوات والمراحل ما بتمهدش لبعض.. وزي ما قلتي يا سارة مثلا الصدمة اللي الطالب بياخدها لما بيدخل اولي ثانوي.. بعد ما كان بيدرس مواضيع تليق بـابتدائي في 3 اعدادي بدل ما يدرس دروس كويسة تمهده للاددب والنصوص والقراءة في اولي ثانوي.. والدروس اللي بتليق بابتدائي دي كانت تحسيها بتستهتر بمستوي عقل طالب في 3 اعدادي.. لما نبقي بندرس ما هو اقرب لنشيد (مش شعر) .. ودرس فيه حيوانات بتتكلم واستهتار مافيش بعده بصراحة..

معنديش تعقيب ، هعيد الكلام

اقتباس :

ثالثا.. الاخطاء والتضارب في المعلومات.. وانتي وضحتي النقطة دي يا سارة وكفاية الخطأ الفادح بتاع الحديث دة..

رابعا.. اللغااااااااات!! .. المشاكل اللي في الكتب المترجمة او الامتحانات مشاكل جسيمة بصراحة.. والموضوع كان هيبقي مقبول لو كان علي مستوي مدرستنا مثلا! لكن الموضوع دة مش بس علي مستوي مدرستنا وادارتنا ومحافظتنا لكن هو علي مستوي الجمهورية.. لان فيه طلبة في ثانوية عامة اشتكوا من اخطاء في ترجمة امتحان ما... وكمان الكتب المترجمة دي بتبقي علي مستوي الجمهوية وبصراحة الاخطاء مخجلة.. احيانا اخطاء بالمعلومات نفسها او ترجمة "حرفية" واخطاء في ترجمة المصطلحات العلمية.. كلها بتجبر الطالب اللي في لغات انه يجيب كتاب نسخة عربي من المادة المترجمة وكمان نسخة عربي من الامتحان عشان اخطاء الترجمة اللي في الامتحانات..

ربنا يستر في امتحانات ثانوية عامة يا بسمة ، مشكلة بجد الحكاية دي
مفيش سنة تعدي من غير أخطاء ، حاجة غريبة
ما يهتموا شوية بالترجمة ، ايه اللي هيحصل لو اهتموا ؟!
السنة اللي فاتت في امتحان الكمبيوتر لولا ورقة العربي مكنتش هحل معظم الامتحان !!

اقتباس :

خامسا.. دراسة مواد مالهاش لازمة! مثلا مادة زي التربية الوطنية دي.. هي ايه لازمتها؟! كل الكلام اللي فيها مدروس مسبقا في التاريخ او الجغرافيا.. ولو كان الهدف منها هو اعلاء روح الوطنية عند الطلاب فهي ما بتعملش كدة.. هي مجرد مادة مكررة من الـ"دراسات" بس بشكل أخف ومش بيتضاف للمجموع!..

فعلاً مادة غريبة وملهاش علاقة بالوطنية ://
ايه علاقة الفن مثلا بالروح الوطنية؟
دة امتحان التربية الوطنية الأخير أنا كتبت كل الاجابات من التاريخ (ما عدا سؤال التصوف من التربية الوطنية للأمانة )
يعني فعلاً هي عبارة عن إعادة للدراسات ..

اقتباس :

سادسا.. قتل الجمال اللي في المادة ومعناها.. انهاردة مس مروة مدرسة الفلسفة.. قالت ان منهج الفلسفة هو هواه من ساعة ما هي كانت في المدرسة! فهي اتخرجت ودخلت كلية واشتغلت ودة كله المنهج ثابت.. وهي شايفة انها كانت بتدرس حاجات "جميلة" في الفلسفة وممتعة في الكلية .. لكن اللي بيدرسوهلنا دة حاجات مملة.. و قالت ان المفروض الفلسفة تبقي مواكبة للتطور اللي احنا فيه ومنهجها يتغير بشكل منتظم..
وكمان اتكلمنا معاها علي موضوع اسئلة "ما رأيك؟" .. السؤال بيقول ما رأيك لكن في الاخر لازم تلتزم بـ"رأي الكتاب" و التعليل اللي في الكتاب.. وقالت انها كان نفسها تبقي المادة اللي بيدرسوهالنا بتساعد علي التفكير والابتكار لكن دة ما بيحصلش.. فالمس اول كلمة قالتها في شرح الفلسفة (كانت اول حصة انهاردة) ان كل واحد ليه فلسفته في الحياة.. المقصود بفلسفته هنا وجهة نظره.. فالمفروض لو عايزين تبقي المادة بتفعل تفكير الطالب تبقي بتقديم وجهة نظر كل طالب مش وجهة نظر الكتاب!!

الفلسفة من قراءاتي على النت حساها حاجة ممتعة فعلاً ، لما نشووووف المنهج بتاعنا عامل ازاي :/
فعلاً أنا استغربت جداً من كلام الكل إنها حفظ ، كنت متخيلاها بتعلم الواحد التفكير وكل واحد يقول آراء بالاستعانة بالمنهج لكن واضح إن دة مش بيحصل وواضح إنها مجرد "رص" معلومات للحفظ
لكن بردو مش عايزة أصدر حكم مسبق قبل ما نشوف معظمها ..

اقتباس :

سابعا.. القصص المبالغ فيها التي ليست موضوعية.. زي شجرة الدر مثلا.. بيبقي الكاتب متيم بالشخصية اللي بيكتب عنها لدرجة انه "قص" الجزء الاخير من حياتها لان نهايتها كانت وحشة.. وبالغ في كل افعالها وصورها انها ملاك رغم ان الشخصية الحقيقية لو حد قرأ عنها بحياد هيعرف انها عملت حاجات كتير مش كويسة..

جايبين انها ملاااااااك وإن نجم الدين ملهوش أي فائدة في الحياة وانها بتتنبأ بالأحداث من غير أي موضوعية فعلاً
والمشكلة دي أنا شايفاها في قصة عنترة بردو ، بيذكروا تفاصيل غريبة ..

اقتباس :

ثامنا.. أنا عرفت ان الواجبات في أمريكا مش زي هنا كدة.. الواجبات بتاعتنا دي مجرد نوع من انواع الواجبات اللي عندهم.. الواجبات بتاعتنا دي اللي هي بتتسمي بـ Worksheet مثلا اللي هو اسئلة ونحلها.. لكن هناك فيه انواع تانية زي: مشاريع projects وتقارير reports و tasks او مهام بتبقي مطلوبة منهم زي قراءة كتاب في يوم معين مثلا.. وعندهم كتابة مقال عن كذا مثلا.. وعمل ابحاث.. وحاجات تانية بصراحة هتبقي ممتعة وهتثقف الواحد!

دي الدول اللي بتفهم يا بسمة ..
ياريتهم حتى يسيبوا لنا شوية وقت واحنا نعمل الكلام دة لوحدنا

اقتباس :

بصراحة لسة فيه حاجات تانية كتير!! وانا زهقت!
دول علي سبيل المثال وليس القصر..

الحصر ولا القصر
هههههههههههههههه

شكراً على مرورك وعلى مشاركتك القيمة يا بسمة

شوفوا دي يا جماعة
بتعليق باسم يوسف

وعايزين نرد على الأسئلة في الآخر علشان يبقى موضوع حواري هادف

لي عودة للتعليق عليهم إن شاء الله

سارة أيمن كتب:

شوفوا دي يا جماعة
بتعليق باسم يوسف

وعايزين نرد على الأسئلة في الآخر علشان يبقى موضوع حواري هادف

لي عودة للتعليق عليهم إن شاء الله

هاهاهاهاههاها.. حلو اوي دة ^_^
كلنا "ميــدو"

السؤال الاول... بصراحة مش فاهمة اوي,, يعني مش فاهمة الفرق بس بما ان الجانية في مصر للتعليم الجامعي وبرة مش كدة يبقي اكيد برة اللي صح
السؤال الثاني... انا املي كبير في مشروع مدينة زويل.. الفكرة كلها في ان يبقي فيه استراتيجية معينة للتعليم.. ولو حاولوا يدرسوا الموضوع و يستفيدوا من خبرات ناس زي دكتور زويل اكيد هيكون فيه تطور كبير!
السؤال الثالث... تغيير النظام بالكامل.. لان نظام "الترقيع" دة بيعمل فجوة بين مراحل التعليم والمناهج فيها ومش حل جذري

شكراً على مرورك يا بسمة وردك الجميل

كل مرة مش بالحق أرد عليكي علشان الرد على موضوع الجلسة >_< ، لي عودة إن شاء الله للإجابة على الأسئلة

وشكراً مرة اخرى على مرورك

أولاً أنا ضد اسم مجانية التعليم !!
لأن في التعليم الحكومي غالباً من الحاجات اللي بسمعها من ناس فيه مفيش أصلاً اهتمام من أغلب المدرسين بالشرح (إلا المدرسين المحترمين طبعاً ) وغالباً التعليم المجاني دة هيخلي الأهل يدفعوا كثير جداً في الدروس الخصوصية من مراحل مبكرة جداً ،، فكدة ؛ فييييييييييييييييييين مجانية التعليم؟

فكدة احنا معندناش مجانية تعليم أصلاً في مصر !
وأنا مش ضد مجانية التعليم لو يعملوها صح ، يعني الدولة تهتم بالمدارس فعلاً ويكون فيه رقابة عليهم صح ويتأكدوا ان الدروس بتتشرح كويس فعلاً ويكون الفصول فيها عدد معقول من الطلاب علشان يفهموا كويس وبعد دة كله بئا لو حد محتاج شرح أكثر في مادة أو الوقت مش مكفيه يبقى ياخد دروس إنما مش نقول مجانية تعليم ونجبرهم على الدروس !


كيف يتم تطوير التعليم الحكومي والبحث العلمي؟
التعليم الحكومي : الحكومة تهتم بيه اهتمام فعلي مش مجرد اهتمام بتقديم أوراق مضبوطة وخلاص !
يعني مثلاً نظام الجودة لما يطبق ( هو نظام جميل جداً على فكرة ) بس كل اللي بيهم المدارس الأوراق تكون مضبوطة وبعد كدة كل حاجة بترجع تاني زي ما كانت
زي ما قلت فوق ، الفصول أعدادها تكون معقولة علشان المدرس يقدر يسيطر عليهم ويتأكد إن المعلومات وصلت للكل والطلاب يقدروا يركزوا ويفهموا مثلاً ، أظن 20 كفاية جداً ولو أقل يبقى أحسن كمان !

البجث العلمي: أولاً المناهج محتاجة تتغير ، معظم المناهج بتشجع على الحفظ فقط مش على الفهم ، حتى المواد العلمية ! ومحتاجين كم المعلومات المطلوب حفظه يقل شوية علشان الواحد يبقى عنده وقت يعرف يبحث حتى ! بدل الطالب طول الوقت مجبر إنه يذاكر (يحفـــــظ يعني) من غير أي وقت للبحث او تنمية مواهبه !
وعندي ملاحظة ، كتاب المدرسة مثلاً في الكيمياء والفيزياء ساعات بيكتب أسئلة كثير في أول الدرس والمفروض نجرب التجارب دي ونكتب ملاحظتنا ، ودة مش بيحصل !
والمعامل إن وجدت أًصلاً المفروض تستغل أحسن من كدة ، ليه ميبقاش (تحت إشراف المدرس طبعاً) الطلاب يعملوا تجارب معينة لأي أسئلة تيجي في بالهم بعد قراءة الدرس ويعرفوا الإجابات بإيديهم من التجارب أو عن طريق البحث ، دة هيكون أحسن من إنهم يعرفوها مباشرة من المدرس والمعلومة هتثبت أكثر في الحالة دي
وفي مادة الكمبيوتر نفس الحكاية ، متكونش الحصة علشان الطلاب يفتحوا "الفيس بوك" وبعدين يروحوا الفصل دة إن وجد معامل كمبيوتر وانترنت في المدراس الحكومية !

السؤال الثالث لي عودة إن شاء الله بسبب الوقت

السؤال الثالث لسة مش عايزة أحط إجابة سطحية ،، فلي عودة مخصوص إن شاء الله وهابقى أعدل الرد ولا حاجة

دلوقتي باشوف الفصل الثالث في الجغرافيا و أجزاء من الفصل الثاني ولسة مشفتش بقية المنهج ..
ليــــــــــــــــــــــه بنعيد كلام من 3 إعدادي ، وكنا زهقانين منه في 3 إعدادي أصلاً ؟!!!!
دي شكوى تضاف للموضوع بردو >_<

بسمة جميل كتب:

هاهاهاهاههاها.. حلو اوي دة ^_^
كلنا "ميــدو"

السؤال الاول... بصراحة مش فاهمة اوي,, يعني مش فاهمة الفرق بس بما ان الجانية في مصر للتعليم الجامعي وبرة مش كدة يبقي اكيد برة اللي صح
السؤال الثاني... انا املي كبير في مشروع مدينة زويل.. الفكرة كلها في ان يبقي فيه استراتيجية معينة للتعليم.. ولو حاولوا يدرسوا الموضوع و يستفيدوا من خبرات ناس زي دكتور زويل اكيد هيكون فيه تطور كبير!
السؤال الثالث... تغيير النظام بالكامل.. لان نظام "الترقيع" دة بيعمل فجوة بين مراحل التعليم والمناهج فيها ومش حل جذري

جميــــــــــــل أخيراً هرد اهه xD

الأول إن شاء الله مش كلنا ميدو =) ، في طلاب مصريين بيكملوا ولما بيدخلوا الكلية بيحاولوا يبدعوا ، إن شاء الله ربنا يوفقنا وكون معقولين ، أهم حاجة الواحد يبقى عنده هدف وطموح ! :/

هههههههههههههه حلو التفكير دة
أنا أختلف معاكي في النقطة دي فقط لأن لو يطبقوا التعليم المجاني صح بمعناه الأصلي أصلاً مع وجود رقابة يبقى تمام أوي ، لأن يا بسمة مش كل المواطنين قدراتهم المادية كويسة ، فيه ناس بيكونوا محتاجين الحكاية دي فعلاً

وأنا كمان معجبة بالمشروع دة جداً =]]]]]] بس مخنوقة منه لأن فيه تفرقة عنصرية O_o يعني لما يبدأوا بالدفعة بتاعتنا و يعملوها على درجات 3 ع ياخدوا الأولاد بس لييييييييييييييييه؟! كدة ضيعوها على البنات فعلاً

فعلاً يا بسمة لو يهتموا بآراء العلماء أحوالنا هتتقدم للأحسن بكثيــر

قعلاً والدفعة بتاعتنا حتى كانت أول دفعة تصدم من الانتقال من المنهج القديم للمنهج الجديد فجأة في أولى إعدادي وبعدين يقوموا مرجعين المنهج القديم تاني السنة دي وفي نفس الوقت تكون فاتتنا حاجات مأخدنهاش كانت موجودة في المنهج القديم O_o

شكراً على مرورك

ولي عودة إن شاء الله

طالب مصري ومناهج مصرية لكن مبدع ، ما شاء الله

وعلى فكرة مقصدش بالفيديو إني أسخر من شكوانا من المناهج لكن علشان نقضي على القناعة السلبية اللي عندنا دي !
إن شاء الله السنة دي تكون آخر سنة فيها المواد الجميلة اللي مش بنحبها دي وبعد كدة إن شاء الله ندخل الجامعات اللي بنحبها بالتخصص اللي عايزينه وكل واحد يبدع في مجاله ^_^ =]

اقتباس :

طالب مصري ومناهج مصرية لكن مبدع ، ما شاء الله

فعلا كلامه جميييل اوى وفكرته جامدة جدا ربنا معاه ويرفع رأس مصر علميا كفاية ان ابو الفتوح كلمه ياريت نشوف الكلام ده بعد الرئاسة مش قبلها بس !!

Mostafa كتب:

اقتباس :

طالب مصري ومناهج مصرية لكن مبدع ، ما شاء الله

فعلا كلامه جميييل اوى وفكرته جامدة جدا ربنا معاه ويرفع رأس مصر علميا كفاية ان ابو الفتوح كلمه ياريت نشوف الكلام ده بعد الرئاسة مش قبلها بس !!

ربنا يوفقه إن شاء الله ويفوز
يا ريت فعلاً يكون فيه اهتمام حقيقي بالتعليم عند الرئيس القادم
الاهتمام بالتعليم هيكون أساس تقدم البلد إن شاء الله ..

عندي تعليق بسيط.. هو اة طالب مصري بس مش مناهج مصرية حضرتك
دة IG
بس دة طبعا ما يقللش من اللي هو عمله.. كفاية انه سعي في مجال اهتمامه رغم انه مش مجال دراسته!
ربنا يوفقه ان شاء الله..
واكيد فيه تانيين مصريين ودرسوا مناهج مصرية واتفوقوا بردو وشرفوا مصر ^_^

بسمة جميل كتب:

عندي تعليق بسيط.. هو اة طالب مصري بس مش مناهج مصرية حضرتك
دة IG
بس دة طبعا ما يقللش من اللي هو عمله.. كفاية انه سعي في مجال اهتمامه رغم انه مش مجال دراسته!
ربنا يوفقه ان شاء الله..
واكيد فيه تانيين مصريين ودرسوا مناهج مصرية واتفوقوا بردو وشرفوا مصر ^_^

احنا TPS xDD
أكيد فعلاً ميقللش بردو من مجهوده
يا رب ، إن شاء الله =]
شكراً على مرورك الجميل

الجزء التاني من الفيديو

عجبني التصرف بإيجابية وعدم الاكتفاء بنقد الواقع
احنا كمان ممكن نعمل كدة إن أي حاجة ندرسها لازم نفهمها (في ناس بتحفظ وخلاص) ومش أي رأي يتكتب في المنهج لازم نتقبله كما هو نتناقش مع المدرس وإن نستفيد من الانترنت في معرفة المعلومات المتعلقة بالدروس وميبقاش مجرد وسيلة للترفيه طوال الوقت

ليا عودة لما اشوف الفيديو بس عايزة احط لينك الخبر دة
https://zohor-mostaqble.ahlamontada.net/t5510-topic

بعد إذنكم ..حد يعرف يجيب دكتور أحمد زويل قال ايه؟
الخبر المكتوب تحت مصدره: بوابة الأهرام بتاريخ 29/3

وزير التربية و التعليم على قناة الحياة : المناهج المصرية غير مطابقة للمعايير الدولية ^_^

انا قريت كل الآراء وعجبتكوا وان شاء الله ليا عودة اقول فيها رأيى