مشاكل الشباب

موضوع: مشاكل الشباب الإثنين مايو 17, 2010 11:45 pm

تاك نيلة فيك وفي خيبتك

مع الشلة
و الاصحاب
الاوغاد
و انا قاعد في قعدة
أو واقف في وقفة
أو نايم في نومة حتى
و بيحصل حوار
أو مناقشة
أو حتى موقف
*******

بالرغم من اني معروف وسط الشلة ان وداني كبيرة.. مش ارنب يعني. لأ ده عشان باسمع اكتر ما بتكلم.. مش بازهق من السمع
و اي حد محتاج يفضفض أو يتكلم و يرغي بيجيلي على طول
مش عارف ليه.. بس جايز عشان مش بصدر أحكام أو اتنرفز على حد بسرعة لو جه يحكيلي سر او كده
المهم.. بالرغم من كده ساعات بقى مابقدرش امسك نفسي
غصب عني بالاقي أقل رد طلع مني هو
تاك نيلة فيك وفي خيبتك
بجد مابعرفش اقول غيرها
لحد ما بقت لازمة في بقي
كل ما يحصل حاجة او اسمع حاجة متعجبنيش اقولها على طول
*******
صاحبي الانتيخ اتصل و قاللي: بتعمل ايه؟
قلتله: ولا حاجة.. لسه صاحي م النوم وهائم على وجهي
قاللي: طب انا جايلك
قلتله: تشرف و تآنس وتنوّر
قاللي: طيب
قلتله: ايه مالك في حاجة ولا ايه؟
قاللي: آه اتخانقت مع امي
سألته: ليه كده بس؟
قاللي: اما اجي هحكيلك
و لما جه وبعد ماهدي شوية قلتله ايه الحكاية بقى؟
قاللي: امي اتخانقت معاها وزعقت في وشها قعدت تعيّط رحت رازع الباب ونازل
ساعتها وداني صغرت واضيقّت مرة واحدة
قلتله: نهارك مش فايت
قاللي: اسمع بس بقية الحكاية
قلتله: اسمع ايه و زفت ايه.. حد يعمل كده في أمه يالا؟
هو انت كلك على بعضك كده تسوى حاجة في الارض من غير رضا امك عليك؟
تاك نيلة فيك وفي خيبتك
*******
يوم تاني كنا واقفين في الجنينة وواحد جي فرحان اوي ومبسوط وسعيد
وبيقولنا سمعتوا شريط حماقي الجديد؟ توووحفة.. رهيييب.. خطير.. وهم ياجدعان
قلتله: ياراجل.. سمعني كده
و معلش رأي شخصي مقصدش ازعل بيه حد
ايه حماقي ده يا جدعاااان
والله ولا صوت و لا صورة ولا أي حاجة خالص
وعليه.. يانا يانتااااااه.. تهد جبال.. نانسي عجرم نفسها متعرفش تقولها
شلت السماعات من ودني و اديت الام بي ثري للواد وقلتله
تاك نيلة فيك وفي خيبتك
*******
القعدة الجد بقى
قعدة سياسية
وكله يحاسب و يوسع.. كلام مهم بيتقال وحاجة عظمة يعني
يطلعلي واحد يقوللي: يعني شوف ولاد الـ (....) بيصرفوا كام على حتة تمثال لا راح ولا جه والناس مش لاقية تاكل.. بلد بنت (....) صحيح

المهم الواد راح مكمل كلامه: احسن حاجة الواحد يهج من البلد دي ويعيش في بلد نضيفة بقى.. في اوروبا ولا حاجة.. البلاد اللي فيها كل حاجه .. ويرتاح من القرف ده كله
قلتله: طب ده مش يبقى اسمه هروب يابوب؟
قاللي: ياعم هروب هروب بلا خاوتة
قلتله: طب تخيل كده ان الكام مليون شاب اللي في البلد بيفكروا زي حضرتك كده.. البلد حيبقي حالها ايه حضرتك؟
راح مولع سجارة و ضحك ضحكة هعهعهع.. وقال: هتبقى خرابة.. هعهعهع
وكان ردي
تاك نيلة فيك وفي خيبتك
*******
وبمناسبة السجاير.. واحد صاحبي حريقة سجاير
ممكن يولع سجارة وهو في إيده سجارة, والايد التانية فيها سجارة برضه
ووسط التلات سجاير أقوله: مش ناوي تبطل سجاير بقى يامعلم؟
يروح رادد عليا والسجارة في بقه ومضيّق عينيه عشان الدخان طالع على عينيه طبعا.. ويقوللي: نفسي والله يابوحميد
قلتله: بص.. ولا نفسك ولا ابوحميد.. انت بتضحك عليا ولاّ بتضحك على نفسك؟
انت لو عايز تبطل هتبطل
لكن انت مش عايز تبطل.. انت بتحب السجاير اساسا
تاك نيلة فيك وفي خيبتك
*******
رفيقي في الدراسة بقي كنا في العربية و بسأله سؤال جه على بالي فجأة كده
بقولك ايه يا شقيق
قاللي: نعمين ياحوووبي
قلتله فكرني كده تاني معلش.. انت سقطت ليه السنة دي؟
قاللي: مكنتش بذاكر ياشيؤووووز
قلتله: ممممم.. ومكتش بتذاكر ليه؟
قاللي: معرفش
قلتله: طب انت حابب الكلية اللي انت فيها و حابب المجال بتاعها؟
معرفش
طب انت دخلت على أساس ايه؟
معرفش
سألته: طب بلاش دول.. نفسك تشتغل ايه لما تتخرج؟
معرفش
قلتله: طيب انت عارف إيه وانا اسألك فيه أساسا؟
أي دونت نووووو هعهع
طيب
تاك نيلة فيك وفي خيبتك
*******
صاحب صاحبي بقى.. دمه خفيف مووووت و يحب الضحك.. عليه ضحكة عفاريت من اللي هيا.. وخصوصا انه ماشاء الله طول بعرض
كنا قاعدين قعدة لطيفة ولقيته ضحك الضحكة اياها
نياااااهاهاهاها
قلتله: خير.. متضحكنا معاك يا عم الوحش
قاللي: امبارح و انا بكلم اخت صاحبتي في التليفون
قلتله: لحظة بس معلش مسمعتش كويس.. أخت صاحبتك؟؟
قاللي: آه.. أخت صاحبتي
و راح مكمل القصة الطريفة.. بس مسمعتش منها حاجة
وسرحت شوية بعقلي كده
سرحت لاني اتكسفت اقوله تاك نيلة فيك وفي خيبتك لانه مش صاحبي.. ده صاحب صاحبي
وقلت في بالي هو فيه راجل يقول صاحبتي؟؟
ايه الخيابة دي؟؟
تاك نيلة فيك وفي خيبتك يابعيد
*******
بس و بعد ما كتبت الموضوع ده سرحت برضه شوية و قلت في بالي
ايه اللي انا كتبته ده
هو انا مصاحب الناس دي ليه
ومصاحبهم ازاي؟؟
جاتني نيلة فيا وفي خيبتـي

*******
منقول للامانــــــــة

بجد يا منة الموضوع جاااااااامد
ناااااااايس توبيك
شكرا ليكي

نورتينى يا بسمة

ههههههه
في البداية اتخضيت من العنوان
لكن الموضوع جامد ^_^
وواقعي جداً
فعلاً مشاكل كتير واللي لفتت انتباهي أكتر معظم شباب مصر مش عنده طموح او أهداف ومشغول في حاجات مش ليها قيمة أبداً وكتير منهم منتهى أمله إنه يسيب البلد وخلاص مع إن "أن تضيء شمعة صغيرة..خير لك من أن تنفق عمرك تلعن الظلام"
وكمان من المصايب الكبيرة إن كتير من الشباب بيتفاخروا إنهم اتخانقوا مع مامتهم أو باباهم وبرضو كل واحد يتفاخر هو مصاحب كام بنت والعكس صحيح

على العموم ربنا يهدي

ومشكووور ةيا منة على الموضوع الجميل
تقبلي مروري
وردة

بصراحة اصلا عنوان الموضوع كان مخوفنىقبل ما احطه بس ده انسب عنوان

وبجد يا سارة اسعدنى ردك