بعض الحقائق التي يجهلها البعض عن قذافى ليبيا !!!!!!

بعض الحقائق التي يجهلها البعض عن قذافى ليبيا



استهلاك الكهرباء في البيوت مجاني

استهلاك المياه في البيوت مجاني
... ... ... ... ...
سعر لتر من البنزين لا يتجاوز 0.08 يورو

البنوك الليبية لا تعمل بالربى

المواطن لا يدفع أي ضريبة . والرسم على القيمة المضافة غير موجود تماماً

لا يوجد ديون على ليبيا ابدا

سعر شراء السيارات في ليبيا هو نفس سعر الشراء من المصانع

كل طالب يريد إكمال دراسته في الخارج تدفع له الحكومة 1627 يورو شهرياً

كل طالب يحصل على شهادة جامعية يحصل على راتب مميز جدا حتى دون عمل !!

عندما يتزوج الليبي يحصل على قطعة أرض مجانية تصل إلى 150 متر مربع أو مسكن

كل عائلة ليبية مسجلة تحصل على 450 يورو شهرياً !!

الحكومة اعطت اكثر من 3 مليون فيلا دوبلكس للشعب الليبي مجانا

يمنع الليبي من العمل خارج ليبيا بل تؤمن له دراسته في الخارج

يستطيع السفر الى اي بلد كان بسهولة ما عدا فلسطين المحتلة نظرا لقطع العلاقات مع اليهود

أسئلة نطرحها الآن ..

بعيدا عن انه قتل ناس كتير ف الثورة دى

لماذا قامت الثورة الليبية اصلا.!!??.

ومحدش يقولى عشان الحرية والديموقراطية

طبعا كلنا شفناها فى مظاهرات امريكا

ـــــــــــــــــــــــــــــــــــــــــــــــــــــــــــــــــــــــــــــــــــــــ

معقولة الكلام ده صح مش عارف بس والله حرام لو يبقى صح طب على الاقل احنا عملنا ثورة علشان نفسنا يبقى عندنا على الاقل نص اللى عندهم طب هما عملوا ثورة علشان امام العالم يقولوا انهم شعب الثورات يعنى ولا ايه !!!!!!

بصراحة انا مش فاهم بس برده المفروض منظلمهمش بس بجد لو الكلام ده حقيقى دى تبقى بجد حاجة غريبة جدا !!!!!!!!!!!!!!

الفترة دي معظم اللي بينشر على الانترنت صعب انه يتصدق
فمش هينفع الكلام دة يتصدق قبل ما أتأكد منه

لكن في حاجة .. هو أصلاً شكله شخص مجنون ومش طبيعي
ولو افترضنا حتى إن الكلام دة صحيح وإن الثوار ملهمش أي حق في الثورة... طبيعي اللي كان بيعمله أثناء ثورتهم؟ طبيعي ابنه اللي كان كل شوية يطلع يوعدهم ببحر من الدم أو القتل في الثوار وقطع الإمدادات عنهم و يجيب ناس بطلجية (مرتزقة) يأذوا المدنيين والثوار بكل الأشكال ؟
حتى الليبيين ساعتها كانوا بدأوا الموضوع بشكل مسالم زي أي مظاهرة من مظاهرات الدول العربية اللي سبقوهم لكن القذافيس هو اللي قلبها حرب وقال مش هيسيبها إلا لما تبقى دمار وخراب
وفي الثورة دي شرد المدنيين وكانوا مش لاقيين حاجة ياكلوها والجرحى كانوا مش لاقيين أي أدوية ومفيش أي احترام حتى للي كانوا بيموتوا

وكان قريب في برنامج في التليفزيون بيتكلم إن مكانش فيه أصلاً جيش لليبيا يحميها الجيش كان مقسمه بين أولاده وتقريباً كل واحد مخلي الفرقة بتاعته لمصلحته هو مش لمصلحة البلد

دة غير إن معروف إن الخدمات الصحية عندهم قبل الثورة حتى سيئة جداً جداً والناس شكلهم تعليمهم سيء جداً كمان


يعني ملخص الموضوع لو افترضنا إن الثوار مش من حقهم الثورة وكل حاجة تمام ، هو يعمل فيهم كل دة علشان مجرد السلطة ؟

متعاطفة جداً مع الثورة الليبية ..

اقتباس :

الفترة دي معظم اللي بينشر على الانترنت صعب انه يتصدق
فمش هينفع الكلام دة يتصدق قبل ما أتأكد منه

معتقدش انه مش كلام حقيقى فى ناس بتأكدوا فعلا بس فى اعتقادى ليه ليبيا عملت ثورة !!!!

على ما أظن لأن ماشى كان الكهرباء والمياه بالمجانى والحياة كانت حلوة فى ليبيا لكن زى ما القذافى كان بيديهم كل الحقوق والصلاحيات دى كان بياخد هو اكتر وده المفروض ميبقاش له هو لكن المفروض للشعب : مثلا لو بيديهم مليون بياخد هو وعصابته 100مليون وهى دى المشكلة وهو ده اللى على ما أعتقد هيكتشف فى الايام القادمة وحكاية انه كان بيقتل وقلبها حرب دى علشان السلطة والكرسى الرئاسى لأن لما الواحد مننا وطبعا اكيد مش كلنا لما بنتولى رئاسة اى حاجة بنتغير بطريقة غريبة وبنعمل كله لمصلحتنا اولا

ممكن رأي صح فعلاً لأن ليبيا دولة نفطية فأكيد غنية لكن مش باين عليها لأنه بيسرقها ..
و كلام منطقي ممكن يكون بيديهم كتير لكن بياخد أضعاف اللي بيديهم

لكن في حاجة عرفتها : في مصريين بيسافروا هناك كتير لأن بيكسبوا! و بأكد على كلامي إني عرفت من حد منهم إن هناك مستوى الرعاية الصحية متدني جــــــداً و ناس كتير عندهم جهل

يعني مش عاملهم خدمات معقولة حتى

دة غير إن بقاله حوالي 40 سنة مفروض عليهم

ودايماً كنا نقرأ في الأخبار ونسمع عن الفتي بتاعه في الدين ، دة كان بيخلي حتى شهر ذي الحجة مختلف عن بقية الدول وعن السعودية

وأسمع عن تحريفه للقرآن


وأنا ذكرت حكاية الحرب اللي عملها علشان أدعم رأيي إنه حد مش طبيعي ومش مضبوط أنه يتولى الحكم

وهما شايفيني ثورة اتعملت في تونس ونجحت ، وثورة في مصر ونجحت إنها تشيل النظام الحاكم وهم كدولة منهوبة و متوليها واحد مش طبيعي ممكن شافوا من حقهم يشيلوه هو كمان وتطلعوا إن بلدهم تتحسن وحد كويس يحكمهم
ودة من حق أي دولة عربية بدل الضعف والفقر اللي الدول فيه ضد الرؤساء الظالمين دول
أتمنى فعلاً زي ما بيقولوا تكون الاجتماع التالي لجامعة الدول العربي "جلسة تعارف بين الرؤساء الجدد" علشان تتحسن أوضاع الدول العربية ويتعظوا من اللي قبلهم مش يعملوا أي حاجة علشان يحافظوا على السلطة

أو ممكن يكون فيه أسباب ثانية وراء ثورتهم ومش معروفة لسة ... الله أعلم

وأقصد إن الخبر مش موثوق فيه لأن دي إحصائيات مهمة ، يعني الخبر منقول من موقوع أخبار موثوق مثلا، ولا من منتديات أو صفحات من غير مصدر موثوق ؟

شكراً على المجهود

بس بصراحة اللى بيضايقنى أوى ان لو فى شعب فى دولة اوروبية او بالمعنى الأصح دولة مش مؤمنة مثلا مسيحية او غير كده طلب ان الحاكم بتاعه يتشال علطول يقدم استقالته لو فعلا حاسس انه غلط فى حاجة معينة وثانيا علشان ميقتلش وميدمرش لأنهم بجد بيخافوا على بعضهم جدا واحنا العرب المسلمين المؤمنين بالله وبتعاليم سيدنا محمد - صلى الله عليه وسلم - بنقتل وبندمر علشان نقعد فى الحكم اكتر واكتر ربنا يهدينا كلنا !!!

وشكرا لمرورك وتفاعلك مع الموضوع

اجيبلك من الاخر يعني مصر علي يمينها ليبيا عملت ثورة و تونس علي شمالها مينفعش ليبيا متعملش يعني
نفسنة بعبد عنك هههههههه

اقتباس :

اجيبلك من الاخر يعني مصر علي يمينها ليبيا عملت ثورة و تونس علي شمالها مينفعش ليبيا متعملش يعني
نفسنة بعبد عنك هههههههه

انت شايف كده يعنى اكيد لازما ناخد برأيك مش ده رأى عمو عاطف برده ؟!!

بصراحة انا بختلف معاك شوية..
زي ما احنا شايفين ان فيه دول متقدمة زي أمريكا أو انجلترا أو ألمانيا مثلا ونفسنا نوصل لنص اللي وصلوله دة..
لكن فيه مظاهرات مستمرة واضرابات.. وكمان سمعت من حد في التليفزيون ان عندهم برة فيه أماكن مخصصة معمولة للتظاهرات والاعتصامات!
فازاي البلاد اللي احنا شايفنها متقدمة وديمقراطية شعبها بيعمل كدة؟.. ببساطة لإن مش من مجرد القراءة عنها هنفهم المشاكل اللي الشعب بيواجهها ومش باننا نسمع مسئول فيها بيتكلم عنها نحكم عليها.. لان المشاكل ممكن تكون مشاكل تثبيت عمال او اجور او معاشات او تأمينات أو حاجات تانية احنا مش مدركينها.. مشاكل مثلا ما يدركهاش الا اللي عاش في البلد..

ونبص باة لليبيا..
أولا.. مش من المفروض ان حد يظن ان شكل البلد أدام العالم حاجة "مالهاش لازمة".. لإن لما يبقي البلد ليها تقلها واحترامها ومكانتها البلاد التانية هتخاف منها وتسمع لها.. ببساطة لما مصر زمان كانت بتطلب حاجة كانت البلاد التانية بتخاف وبتنفذ دة.. لكن دلوقتي احيانا مسئولين مصريين بيطلبوا حاجة وبعض البلاد التانية زي امريكا او اسرائيل بيرفضوا أو يتجاهلوا وما يهمهش كلام دولة زي مصر! .. فازاي دولة زي ليبيا بيحكمها واحد "مجنون" يكون ليها مكانة في العالم؟!.. لما يكون رئيس دولة بيقول ان الديمقراطية دي مشتقة من كلمتين "ديموا" و "الكراسي" و بيطلع كدة يفتي في الدين ويحرم الحلال ويحلل الحرام ويحرف في القرآن.. ويعد يقول في خطاب المفروض انه يتقال في كام دقيقة هو قاله في ساعة (دة كان في مؤتمر بس مش فاكرة ايه بالظبط)... ويطلع في حوارات في برامج اجنبية يضحك العالم علي ليبيا و"زعيم ليبيا" .. فبكل بساطة الناس هتقول اذا كان دة يبقي "قائد" و"زعيم" و"رئيس" الدولة يبقي الشعب عامل ازاي؟.. لما يكون رئيس دولة بالعقلية دي والجهل دة والجنان دة .. ازاي نقول ان الشعب مالهوش حق يثور عشان يختار رمز مشرف يقود بلده.. الكلام دة من ناحية مكانة البلاد وتقلها في العالم ورئيسها
مثلا لو الواحد جه يفكر في رئيس لمصر.. هيفكر يكون انسان عاقل حكيم بيفهم دبلوماسي وشجاع.. مش مجنون!

ثانيا.. من ناحية اقتصاد البلد وحالها.. القذافي كان بيسرق البلد.. بلد في حجم ليبيا بالنفط اللي فيها دة كله كانت هتبقي دولة غنية لو ما كنش بينهبها.. ما اقصدش دخل الفرد لاني بصراحة ما اعرفش عن دخل الليبيين.. بس بتكلم عن غني البلد نفسها.. لما نشوف بلاد الخليج وبلد زي الامارات.. دبي فيها بقت مدينة عالمية تشرف الوطن العربي كله.. لكن ليبيا؟ ماحدش بيسمع عن ليبيا اصلا! البلد كانت مدفونة في الجهل والنهب.. وزي ما سارة ذكرت المستوي الصحي متدني جدا.. والمستوي التعليمي كمان..

ثالثا.. من الناحية القانونية او الدستورية باة.. هو طبق علي بلاده الحكم عن طريق "الكتاب الاخضر" .. كتب كتاب وبيمشي الشعب عليه.. بعيدا عن القوانين الدولية اصلا! .. وحكم البلد 40 سنة .. اظن دي كلها ادلة علي انه كان ما بيتبعش قانون اصلا...

"ومحدش يقولى عشان الحرية والديموقراطية
طبعا كلنا شفناها فى مظاهرات امريكا"
أنا ما فهمتش الجزء دة..

أنا رايي ان بلد زي ليبيا كان لازم تقوم بثورة من زمان! ومستغربة ازاي اتأخروا كدة في القيام بالثورة دي.. بس اكيد طبعا اتشجعوا بثورة تونس ومصر.. بالظبط زي ما مصر اتشجعت بثورة تونس!

ومع افتراض ان المعلوماتت اللي في الموضوع دة صحيحة .. فسبب قيام اي بلد بثورة مش بس الفلوس والدخل.. كل بلد بتقوم بثورة من نوع مختلف ولاسباب مختلفة.. واظن ان عدم تطبيق القانون الصحيح واختراع قانون او دستور جديد من الرئيس دة سبب كافي اصلا لقيام ثورة علي واحد طاغية زي القذافي!

وطبعا مش هتكلم كتير عن اللي القذافي وولاده عملوه في ليبيا أثناء ثورتهم.. لإن كلنا عاصرنا دة وشفناه وسمعنا عنه.. لكن بذكر الموضوع دة بس لان دة لو دل علي شئ فهو يدل علي جنونه وظلمه.. ولو كان هو انسان كويس ومريح الشعب طول الفترة دي ومش مخليهم عايزين حاجة كدة يبقي كان دة المفروض هيبان عليه في موقف زي الثورة.. لكن هو قتل في شعبه ودة دليل علي انه انسان مش سوي!!

شكرا علي الموضوع الحواري.. وفتح باب النقاش