أعتصام الأولتراس

رأيكم إيه فى العتصام السلمى للأولتراس أمام مجلش الشعب و هل مطالبهم مشروعة ولا إيه رأيكم !

شكراً جزيلاً على الموضوع

أولاً هابدأ بالبيان للتعرف على مطالبهم بشكل أوضح
ولي عودة إن شاء الله للتعليق
وإن شاء الله الأعضاء يتفاعلوا مع الموضوع

اقتباس :

بسم الله الرحمن الرحيم

الاولتراس جزء لا يتجزء من نسيج شعب مصر ومن نسيج ثورة مصر ...نحن لا نذكى انفسنا على ايا من الثوار ولكننا نعتبر حادثة بورسعيد المدبرة للتخلص من الاولتراس هى القشة التى ستقسم ظهر الفساد والنظام والتى ستدفعنا بايدينا وايديكم وايدى كل احرار مصر الى السعى بقوة وراء التخلص من هذا النظام الفاسد والسعى الى بداية ثورة حقيقية من جديد ... ثورة تقضى على النظام الفاسد بأكمله



مطالبنا لا تتوقف على على القصاص لشهداء جمهور الاهلى والاولتراس فقط ولكننا نعتبرهم شهداء ثورة ...شهداء تم الغدر بهم لوقوفهم مع الثورة ومع الحق ومع الثوار ...نحتسبهم عند الله شهداء ولا نزكيهم على خالقهم وعلى حرية بلادهم ...بل مستعدون للتضحية بمثلهم من اجل استراد حقوقهم وحقوق جميع شهداء مصر...



نعتصم امام مجلس الشعب ( الاولتراس واهالى شهداء بورسعيد واهالى شهداء الثورة ) نقدم طلباتنا لاسترداد حقوق بلد باكملها وليست حقوق شهدائنا فقط .. ...



1- القصاص ...القصاص لكل من قتل ثوار مصر واخرهم شهداء بورسعيد وتحديد محاكمة عاجلة وعادلة وعرض الموضوع برمته على الرأى العام واعلان الجهات العليا المسئولة عن تدبير هذة المؤامرة وعدم حصر الموضوع فى جمهور المصري وتقديم المتهمين الحقيقين دون تلفيق للتهم ...



2- نقل قيادات الداخلية المتهمة بقتل شهداء بورسعيد الى السجن وعدم الاكتفاء بترفيهم فى اكاديمية الشرطة ....



3- تطهير الداخلية وقيادتها الفاسدة التى تقف وراء اى مؤامرة فى البلد او قتل لثوارها وهم اسماء معلومة ومعروفة نملك منها الكثير لتقديمها للجهات المسئولة عن ذلك ...وندعو الجميع الى تقديم مقترحاته فى هذه الجزئية




4- اعتراضنا على عقوبة النادى المصرى هو اعتراض على تدخل الجهات السيادية الفاسدة المدبرة لهذه المؤامرة فى عقوبات كرة القدم فهو قرار مملى من رئيس الوزراء والذى نعتبر وزارته من احدى اسباب الفوضى فى البلاد



لذلك ندعو كل احرار مصر من جميع الاطياف وجيمع الثوار النزول الى الشارع لبدأ ثورة جديدة على نظام فاسد اخذ شرعيته من النظام البائد



لن نكتفى بالاعتصام امام مجلس الشعب ومستعدين للتصعيد الى اقصى حد فى حالة عدم الاستجابة لمطالبنا كاولتراس وكثوار من نسيج هذه البلد



يسقط حكم العسكر ...الثورة مستمرة

أولاً بالنسبة للاعتصام أكيد لأنه سلمي مش بيسبب أي مشاكل إن شاء الله

بالنسبة للمطالب هي مشروعة فعلاً وربنا يوفقهم ويستجاب لها والمجرمين يعاقبوا

اقتباس :

لذلك ندعو كل احرار مصر من جميع الاطياف وجيمع الثوار النزول الى الشارع لبدأ ثورة جديدة على نظام فاسد اخذ شرعيته من النظام البائد

معترضين على حكم المجلس حالياً ؟هو فعلاً له سلبيات كثيرة..
لكن انتخابات الرئاسة في الطريق إن شاء الله وتم الإعلان عن الجدول ، أقصد في تسليم للسلطة إن شاء الله ايه المشكلة حالياً؟

وشكراً جزيلاً على الموضوع

المشكلة إن فاضل شهرين على الإنتخابات و العسكر مش مديين فرصة لحد إنو يشتغل صح و مفيش خطوة واحدة بتتاخد صح ضد المجرمين أو لتطوير حاجة أو لحل أزمة و كل يوم بيموت ناس و إحنا نقول أنتخابات طب و دم الناس اللى بتموت من إجرام أو بنزين دول نعمل فيهم إيه ّ!!!!!

صح في سلبيات ومشكلات كثيرة
قصدي كان إن المطلب سابقاً من الجميع تقريباً تحديد جدول زمني للانتخابات للتأكد من ان المجلس هيسلم السلطة وهم حددوا وحالياً الكل ماشي في إجراءات الانتخابات ، وأنا فهمت من الكلام إنهم ثائرين على المجلس .. بيطالبوه بالرحيل؟ ولا ايه المطلب؟ (عارفة المطالب - المشروعة- الأخرى باتخاذ أي خطوات إيجابية لحل المشكلات ومعاقبة المجرمين) أطلب التوضيح
والحاجات السيئة اللي بتحصل علشانها الاعتصام موجود وإن شاء الله مش هيخلص من غير فائدة!
وأول نتائج الاعتصام :"استئناف الإسماعيلية" تحدد 17 أبريل موعدًا لمحاكمة متهمي "مجزرة بورسعيد" المصدر: الأهرام سبورت
و إن شاء الله بقية المطالب تتحقق ما دام في ضغط

بصى يا سارة الأولتراس مقتنع كل الأقتناع إن اللى ساعد فى قتل أخواتهم دول هو المجلس العسكرى اللى قفل عليهم الباب من برة و فتح الباب لجمهور بورسعيد و دة كلو فلازم يطلبوا بسكوت دولتوا عشان يعرفوه إن كل شئ مفهوم و إن إحنا عارفين مين اللى عمل دة و مين اللى بيخرب فى البلد دلوقتى عشان يكره الناس فى الثورة لأنو جزء من النظام فلا نقولها بأعلى صوت يسقط يسقط حكم العسكر

شكراً جزيلاً على التوضيح

لو أنتى شايفة إن رأيى غلط يا ريت تقوليلى هل فعلا المجلس العسكرى مدان فى أحداث بورسعيد !

مختلفة فقط مع عبارة "مقتنعين كل الاقتناع"
سأقتبس جزء من رد سابق لي يوضح رأيي:

"أتمنى عندما تنتهي مدة حكمهم أن تتم محاكمتهم محاكمات عادلة في الجرائم التي حدثت في عهدهم أبرزها مجزرة بورسعيد - وهذا لا يهين كرامتهم على الإطلاق! - حتى نعرف إن كانوا اشتركوا فيها أو تجاهلوها أو حتى كانوا أبرياء !
من الممكن أن يكونوا مسئولين مسئولية سياسية لا جنائية ، أو يكونوا مسئولين مسئولية جنائية أيضاً، المحاكمة هي اللتي تحدد
لو اتصف المسئولون بالصدق وخرجوا بعد كل حدث ليوضحوا ما حدث فيه بكل صراحة وتحملوا المسئولية إن كانوا مخطئين لما أغضبوا الشعب بهذا الشكل ! "

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
فلا أحد يستطيع الإنكار أن هذه الكارثة حدثت في عهدهم لذلك هم مدانون
لكن ما الذي يؤكد أنهم مدانون جنائياً ، أن

اقتباس :

هو المجلس العسكرى اللى قفل عليهم الباب من برة و فتح الباب لجمهور بورسعيد و دة كلو

؟؟؟؟

فى ناس من الأولتراس من طوخ هنا كانوا واقفين برة ساعت اللى حصل و بيحلفوا كل أيمانات ربنا إن اللى لحم الباب من برة واحد من الجيش و واحد معاه من الشرطة ظابطين دى تدل على إيه و هم طلعوا أعترفوا بس قالوا إحنا بنعمل كدة كل ماتش مع الفرقة الضيفة و جمهورها عشان مش يحصل مشاكل و دة طبعا من بيحصل نهائى فى أى ماتش دة معناه إيه !!!!

احب ارد اولا فكرة الموضوع رائعة
ثانيا اعترض اولا علي لفظ العسكر لان انا سمعت كتير ان كلمة العسكر تقال علي جيوش المرتزقة فاعتقد ان مفيش مصري ايا كان يقبل انه يقول جيوش المرتزقة
ثالثا منقدرش نأكد ان المجلس العسكري مدان او نحكم علي حد القضية مازالت لم ينطق فيها بحكم واحنا ممكن نقول اتهامات لكن مش معانا دليل وعايزة كمان اسأل سؤال يعني هو المجلس العسكري هيستفيد ايه لما يموت اكثر من 73 هل هو للدرجة عايز الناس تهتف ضده وتعمل مظاهرات !!!! سواء كان له يد او لا منقدرش نحكم عليه الا بعد التأكد
حاجة اخييرة احب اقولها الالتراس نفسهم قالوا في اول الموضوع ان اللي عمل فيهم كدة هو جماهير المصري فليه نسيب ده ونمسك في حد تاني !!!

Hema Gad كتب:

فى ناس من الأولتراس من طوخ هنا كانوا واقفين برة ساعت اللى حصل و بيحلفوا كل أيمانات ربنا إن اللى لحم الباب من برة واحد من الجيش و واحد معاه من الشرطة ظابطين دى تدل على إيه و هم طلعوا أعترفوا بس قالوا إحنا بنعمل كدة كل ماتش مع الفرقة الضيفة و جمهورها عشان مش يحصل مشاكل و دة طبعا من بيحصل نهائى فى أى ماتش دة معناه إيه !!!!

أولاً مش بحاول إني أجادل أو أدافع وخلاص - لو طلعوا مخطئين يبقى هم مخطئين مفيش جدال - لكن لازم نحاول نحكم على الموضوع بدون تعصب .. مقتنعة جداً إن لازم نحكم على كل موقف لوحده

لو واحد من الجيش كان بيلحم الباب يبقى وضعنا قدام احتمالين:

* المجلس العسكري محرضه وساعتها هتكون مؤامرة فعلاً وجريمة كبرى

* واحد عسكري من الجيش خائن و باع ضميره بتحريض من أي قوى أخرى مش ضروري المجلس العسكري
يبقى بردو مش متأكدين !

في أدلة تانية؟ .. الموضوع فعلاً محتاج محاكمة عادلة !
و مين اللي اعترف ، الشرطة ولا المجلس ولا ضابط الجيش؟ لأن دة هيوضح الموضوع أكثر

خبر متعلق بالموضوع من صفحة UA07

اقتباس :

الحمد لله ...بعد تحديد جلسة للمحاكمة يوم 17 ابريل تمت الاستجابة لثانى مطالب الاعتصام وقرر وزير العدل تفريغ دائرة خاصة لمحاكمة المتهمين فى احداث بورسعيد محاكمة عادلة وعاجلة وبلغ وزير العدل عدد من قيادات الجروب القرار بنفسه بعد جلسة بمكتب الوزير .....

عرفتو بأة إن المجلس العسكرى و النظام اللى ماشى عليه مش بيجىة غير بالضغط عليه و الجبن من الناس دى

موضوع مش جديد تباطؤ المسئولين للأسف
أتمنى يختفي إن شاء الله مع الرئيس القادم المنتخب + شعب عارف قوته + شباب مهتم بقضايا بلده

انا طبعا مع الاعتصامات السلمية للاولتراس لان الحكومة المصرية ما بقتش تيجي غير بالضغط!

بس أنا عايزة أعلق علي حاجة علي كلام سارة...
يعني هو احنا كنا لقينا ادلة ولا اتحكم علي حد في موقعة الجمل؟ ولا في اي حاجة من اللي حصلت في ايام الثورة؟ رغم ذلك احنا عندنا يقين ان نظام مبارك هو اللي عمل كدة.. وطب ما احنا عندنا فيديوهات لضرب وسحل وخرطوش لجنود عسكريين هل اتحاكموا او المجلس ادين؟ ولا اي حاجة بتحصل!!
انتظار المحاكمة العادلة للمجلس العسكري بالظبط زي انتظارنا بقالنا فوق السنة انهم يقبضوا علي اللي قتل الشباب!! .. وفي الاخر ييجي شفيق اللي هو كان رئيس وزراء لما حصلت موقعة الجمل بيترشح للانتخابات! ومافيش اي قانون يمنعه!
كل ما بنسكت الموضوع بيتعك وما حدش بيتحاكم! احنا بنضحك علي نفسنا بس! حاجة تحزن....
وفي الاخر انتخابات الرئاسة بتقام تحت ادارة مجلس عسكري قتل شعبه وسحله ودمره,, وعايزنها تبقي نزيهة!

ويعني يا اسراء هو كان ايه استفادة مبارك ونظامه انهم يقتلوا الثوار؟ ولا كان ايه استفادة اي ظالم انه يظلم حد؟! هل عشان عايز الناس تكرهه؟!
المجلس العسكري عنده غباء سياسي بس.. والاولتراس كان ليها مواقف كتير بينادي باسقاط حكم العسكر وضده علي طول وكان بيهتف ضده وضد الداخلية في الماتشات فلو انتي بتدوري علي دافع للقتل اظن ان دة ممكن يكون دافع كافي بالنسبة لهم! .. بينتقموا من الاولتراس
وموضوع "العسكر" دة ... احنا لما بننتقد وبنشتم في العسكر المقصود بيه المجلس العسكري يعني القيادات وادارته للبلاد (لانه طالما دخل في نطاق السياسة فهو معرض للنقد) .. وكمان في الجنود اللي بيبيعوا ضميرهم بتنفيذ اوامر المجلس العسكري.. لكن اكيد فيه جنود كويسين بيدافعوا عن بلدهم ورافضين اللي بيحصل من قياداتهم!

شكرا علي طرح الموضوع للنقاش

بسمة جميل كتب:

انا طبعا مع الاعتصامات السلمية للاولتراس لان الحكومة المصرية ما بقتش تيجي غير بالضغط!

بس أنا عايزة أعلق علي حاجة علي كلام سارة...
يعني هو احنا كنا لقينا ادلة ولا اتحكم علي حد في موقعة الجمل؟ ولا في اي حاجة من اللي حصلت في ايام الثورة؟ رغم ذلك احنا عندنا يقين ان نظام مبارك هو اللي عمل كدة.. وطب ما احنا عندنا فيديوهات لضرب وسحل وخرطوش لجنود عسكريين هل اتحاكموا او المجلس ادين؟ ولا اي حاجة بتحصل!!
انتظار المحاكمة العادلة للمجلس العسكري بالظبط زي انتظارنا بقالنا فوق السنة انهم يقبضوا علي اللي قتل الشباب!! .. وفي الاخر ييجي شفيق اللي هو كان رئيس وزراء لما حصلت موقعة الجمل بيترشح للانتخابات! ومافيش اي قانون يمنعه!
كل ما بنسكت الموضوع بيتعك وما حدش بيتحاكم! احنا بنضحك علي نفسنا بس! حاجة تحزن....
وفي الاخر انتخابات الرئاسة بتقام تحت ادارة مجلس عسكري قتل شعبه وسحله ودمره,, وعايزنها تبقي نزيهة!

أولاً أنا مبصتش للموضوع من الزاوية دي ، ممكن فعلاً احنا موقنين إن موقعة الجمل اتعملت من النظام السابق لأن الثوار ضدهم فبيحاربوهم ، يبقى ممكن جداً موقعة بورسعيد من النظام الحالي لأن الالترس ضدهم !!

لكن النظام السابق محفوظ وواضح للكل فساده وظلمه ، لكن النظام الحالي المفروض "أول مرة نجربه " فبنتعامل معاه بحسن نية إلا إذا اتضح فعلاً إنه مخطيء

أنا أصلاً من بداية الردود مش بدافع لكن وجهة نظري إن منقدرش نقول 100 في 100 إنهم المسئولين جنائياً إلا لو حصلت محاكمة ، احنا مش قضاة

ليه ميبقوش مسئولين عن حوادث تانية بس دي لا؟؟ (بتكلم على المسئولية الجنائية)
وبعدين أنا متفائلة من ناحية القضاء لأن:

قبل كدة محدش كان مصدق إن نظام مبارك هيقع ، محدش كان مصدق إنه هيتحاكم أصلاً ومع ذلك كل دة حصل

ليه ميجيش رئيس كويس ويحاكمهم؟؟!
أنا مش بخدع نفسي لكن أنا فعلاً نفسي دة يحصل
هيبقى دة الحل المثالي للموضوع
وبعدين مش هيزوروا الانتخابات لأن الإقبال عليها هيكون كبير جداً إن شاء الله و الناس مش بتسكت دلوقتي على أي ظلم
وشكراً لأنك وضحتي وجهة نظرك