سمعنا صوتك

الموضوع بعنوان سمعنا صوتك وطبعا مش غناء الموضوع ببساطة ان احنا كصغيرين يعني في السن لكن بالتأكيد كبار بعقلنا لازم يكون لينا صوت في كل مكان ولازم نشارك برأينا ونتناقش ممكن البعض يا خد فكرة الموضوع انها فكرة ساذجة لكن في الحقيقة ان احنا لو اتنين حتي ممكن نعمل حاجة
انا فكرت في الموضوع بهدف ان كل واحد يعرف وجهة نظر التاني في موضوع معين وممكن نقتنع بأفكار بعض ونفكر في حلول في الموضوع ده حد هيقترح موضوع وكلنا نتناقش فيه انا بدع كل الأعضاء مدرس طالب طالبة والمفروض ان المناقشة هتكون عامة بس طبعا بدون تجاوز قوانين المنتدي مش هنحط فرق مبين حد طبعا في حدود الاحترام ونناقش بطريقة متحضرة ممكن الموضوع الي نتناقش فيه موضوع سياسي او رياضي او اجتماعي او حاجة تتعلق بالدراسة ويكون موضوع مهم بتمني من كل الأعضاء التفاعل وكل عضو يدخل لازم يقول رأيه حتي لو هو شايف ان رأيه مش مهم لكن في الحقيقة عند شخص تاني ممكن تفرق كتير جدا
ودائما لازم نفتكر ان عيبنا هو السكوت فلازم الكل يسمعنا رأيه

ويارب فكرتي تعجبوا

الموضوع الي انا بقترحه وياريت الكل يقولي رأيه بتمني فعلا ان الكل يشارك فيه وفي مراحل عمرية مختلفة
الدروس الخصوصية

الي بياخد دروس خصوصية بياخدها ليه هل مبيفهمش من المدرسة ؟؟؟؟؟؟؟ولا ده حاجة طبيعية؟؟؟؟؟؟؟؟
وبالذات الي بياخدوا عند نفس مدرسين المدرسة الموضوع ده بالذات محتاج توضيح

اتمني التفاعل لكل الاعضاء

موضوع رااائع يا إسراء
إلى الأمام دااائماً

وأنا هبدأ
ايه رأيكوا في المنهج الدراسي وتطوراته؟ ومدى ملائمته لوقت الفصل الدراسي؟ وايه رأيكم في نظام التعليم الجديد؟؟

منتظرة تفاعل
مشكورة مرة تانية يا إسراء

ايه دة احنا حطينا الردين مع بعض ههههههههه

خلاص نتناقش الأول في موضوعك يا إسراء وبعدها ندخل في موضوعي

وأنا وجهة نظري (لأن في كتير من زميلاتي بياخدوا دروس) إن اللي بياخد دروس خصوصية غالباً بيكون مش عايز يعتمد على نفسه في المذاكرة فبيعتمد على المدرس الخصوصي انه ينطمله معلومات الدرس والتدريبات اللي يحلها ومعنى كدة غالباً إنه مش بيكون مركز في الفصل (على حسب ملاحظتي)

لكن مش معقول نظلم بردو كل اللي بياخدوا دروس ممكن يكونوا مش بيفهموا من بعض المدرسين
وفي المدارس التانية مش بيكون في شرح
وكمان دلوقتي الترم الدراسي قل أوي والمناهج طولت فبقينا مضغوطين أوييييييي فممكن دة بيعمل خلل والبعض مش بيعرف يتجنبه

انا عن نفسي مجربتش تجربة اني اخد درس خالص بس انا شايفة ان هي بتضيع الوقت بس لان الواحد ممكن يعتمد علي نفسه انتي كمان يا سارة مجربتيش فاكيد الناس الي بياخدوا دروس وجهة نظرهم هتبقي واضحة انا شايفة ان بقت برمجة عند الناس ان لازم دروس

شكرا يا سارة علي ردك الجميل منتظرين الباقي

اولا موضوع جميل يا اسراء.. بس لو كان غناء كان هيبقي احلي ههههههههه
لا بجد الفكرة جميلة
وانا هقولكوا رايي اللي قلته عن درااااسة

انا عن نفسي مش باخد دروس خصوصية والسبب اني بفهم من المدرسين الحمد لله في المدرسة
والحمد لله بقدر اعتمد علي نفسي في المذاكرة

لكن اللي بياخدوا دروس مش لازم يكون يا اسراء برمجة يعني

1- فيه طرق شرح تعجب ناس اة وناس لاة
يعني مدرس يحفظ ومدرس يفهم
ومادة محتاجة حفظ ومادة محتاجة فهم
يعني اختي مثلا كان اصحابها يفهموا من مدرس معين
وهي ما تفهمش منه لكن تفهم من واحد تاني
الحاجات دي بتفرق

2- احيانا ودة موجود في واحدة قريبتي
ان مثلا مدرسة الفيزيا في المدرسة عندها شاطرة جدا
بس الفيزيا محتاجة حل
والمس مش بتحل معاهم عشان يا دوبك المنهج
فبتاخد درس عشان تحل فيه وتتابع

3- فيه مدرسين (دة مش في مدرستنا او علي الاقل لسة ما قابلتوش وان شاء الله مش هقابله) مش بيبذلوا كل جهدهم في الشرح الا في الدروس ودة طبعا خطا مدرس

4- فيه باة فعلا طلبة مش بيهتموا بالحصة خالص ودول مش عارفة بيبيجوا مدرسة علي ايه اصلا
ودة خطا طالب طبعا

5- فيه باة يكون واحد مش بيقدر يذاكر لوحده واظن يعني ان دي حاجة موجودة في بعض الناس
ومافيش حد من اهله مثلا يقدر يساعده
وفي المدرسة طبعا مافيش الوقت لكدة
لكن في الدرس المدرس ممكن يعيد كتير او الطالب يروحله حصة اضافية يشرحله فيها جزء معين
كدة يعني

6-فيه طبعا في بعض المدارس الحكومية مافيش شرح ودة باة مش بايد الطالب لانه يا ياخد درس ويفهم يا يحارب الدروس ويفضل اعد مش فاهم اي حاجة

7-السبب الاخير باة انه ساعات فعلا بيبقي برمجة
يعني مثلا اعرف ناس والله في 1 و 2 ابتدائي وبياخدوا دروس
حاجة تشللللللللل
ربنا يصبرنا

لكن باة موضوع الدروس الخصوصية اللي بيخرب البيوت دة باة
بجد لو عايزين يحاربوه ويقضوا عليه
لازم المنظومة التعليمية كلها تتغير
وانا عندي امل في احمد زكي بدر
بس يا ريت يدوله الفرصة مش يلزقوله اي تهمة عشان يمشوه
عشان الراجل بيعمل اللي عليه وعداه العيب "وازح"
بلاش سياسة في الموضوووووووووووووع
نرجع لموضوعنا
احمممممممممممم
كنت بقول يعني ان الحكومة ربنا يخليهالنا ان شاء الله هتعدل المنظومة
يا رب نكون بس لسة عايشين وقت ما الحال يتعدل

وأنا أعرف ناس في تانية ابتدائي وبياخدوا دروس!!

فعلاً الوزير الجديد في أمل إن شاء الله انه يصلح التعليم
وبشكل عام هو حازم جداً وهو دة اللي هيمشينا
لكن نفسي نلاقي طرق نتواصل بيها مع وزارة التربية والتعليم ونقول آرائنا ومشاكلنا واقتراحاتنا!!
لكن أظن دة مستحيل

مش مستحيل ولا حاجة
لما كان الدكتور زكي بدر جاي في العاشرة مساء
كان بيقول انا لحد وانا جاي في الطريق
والمسجات عمالة توصله شكاوي طلبة واولياء امور وقائمين علي التعليم
يعني مش بعيد اوي
بس نوصل ازاي لرقمه؟؟
او ازاي نقدر نبعتله.. احنا اما صدقنا حد جه بيهتم بالشعب

باريت يضيفوا خاصيز مثلاً (اتصل بنا) للاقتراحات والشكاوي في موقع وزارة التربية والتعليم
لأن نفسي في حاجة زي كدة من زمان
وياريت لو اتعملت يهتم بيها فعلا مش ورق وخلاص

كدة هنقلب الموضوع
نرجع لموضوعنا أحسن هههههههه

وأنا هاضيف سؤال
كلنا اتكلمنا على سلبيات الدروس الخصوصية
في رأيك ما هي إيجابياتها؟؟

اولا موضوع رائع ويارريت لو يعني خلصنا مناقشة الموضوع ده نبتدي في موضوع تاني ونستمر


انا عن نفسي مابخدش دروس خصوصية لان الحمد لله المدرسين بتعانا بيفهمونا ودي اهم حاجاة عندهم وبيقوللنا مش مشكلة هنعيد تاني وتاني في الفصل

انما بالنسبة للمدارس التانية المدرسين بيقولوا احنا نقول لهم اللي في الكتاب ولما يروح الطالب يبقا يسال المدرس الخصوصي بتاعه ودي غلطة المدرس

انما في طلبة بتقول مش مشكلة اركز ولا لا في البيت المدرررس يبقا يشرحلي ودي غلطة الطالب

وفي بقا طلبة بيبقا معندوش شجاعة ان هو يسال المدررس في الفصل ويقول انا الوحيد اللي مش فاهم مع ان المدرس هيشرح تاني وتالت وده غلطة كبيرة لان انتى لو مش فاهم حاجة اسال المدرس امال هو بقى مدرس ليه علشان يشرح ولا يكتب الدرس ويعد على الكرسي

يجماعة انا كنت عاوز اعمل تبادل اعلانى معاكوا ممكن حد يكلمنى على الاميل
ممنوووع وضع إيميلات على العام

السلام عليكم
خاصية التبادل الإعلاني مش متاحة عندنا حالياً

شكرا اولا علي مشاركتكم كلكم وفعلا فيه ناس في اولي وتانية ابتدائي بياخدوا دروس ده بقي الي بتكلم عليه البرمجة وصلت الدرجة ان فيه في كي جي بياخدوا دروس !!!!!!!!!!ودي حاجة انا شفتها اصلا الاهالي اول لما ابنهم بيدخلوا المدرسة مبيسألهوش عن المدرسين او حاجة بس علي طوول بيتفقولهم مع المدرس وفعلا فيه ظروف معينة ماشي بيبقوا مضطرين ياخدوا دروس فيها دي مقدرش اعترض لكن اظن انه مش هيبقي مبيفهمش من ولا مدرس او ولا مدرس عاجبه اكيد فيه واحد بس حتي من المدرسين بتوعه بيفهم منه يس لو جينا شفنا هنلاقي الناس دلوقتي بياخدوا دروس في كل المواد
وكمان نيجي بقي علي مدرسين الدروس الخصوصية اولا بيستغلوا اولياء الامور وبيخليهم يفلسوا من ورا الدروس وبيحددوا للولاد ميعاد الدرس في وقت يكون فيه مدرسة وكأن المدرسة دي ملهاش لزمة نهائيا وبيقعدوهم فوق بعضهم ومبيقاش ليهم مكان كأنهم مش بني ادمين .

وانا كمان علي فكرة عندي امل كبير جدا في الوزير الجديد ان شاء الله التعليم يتقدم