مصر بتتغير وانا هتغير

أنا هتغير ..أنا هتغير
والمرة دي مش هبقى صغير
يعني مش هرجع في كلامي
ولا يمكن أضيع أحلامي
مش هستسلم تاني لفشلي
مهما واجهت هاعيش أيامي

أنا هتغير .. أنا هتغير
هبدأ أصلح كل عيوبي
وأستغفر من كل ذنوبي
هنسى الماضي بجرحه وألمه
لازم أتغير قبل غروبي

أنا هتغير ..أنا هتغير
وهحاسب أنا نفسي يوماتي
والايجابية هتملى حياتي
مبقاش ينفع تاني أتفرج
والناس محتاجة لأوقاتي

أنا هتغير ..أنا هتغير
هضحك للناس أوي من قلبي
هبقى صريح ولا مرة هخبي
مش هتساهل تاني في حقي
والتوفيق هيكون هنا جمبي

أنا هتغير ..أنا هتغير
حب الخير هيكون احساسي
وهشوف أخبار أهلي وناسي
واللي هيغلط فيا هسامحه
وإن يوم شوفته هشيله فوق راسي

أنا هتغير ..أناهتغير
من دلوقت أنا لازم أضحي
مش هضعف ولا هرضى بجرحي
فات من عمري كتير عالفاضي
جه الوقت اللي هشوف فيه فرحي

أنا هتغير..أناهتغير
ايدي في ايدك يلا ساعدني
عايزين نعمل حاجة أوعدني
إنك تتغير للأحسن
عايزك جمبي عشان تساعدني
أنا هتغير..لازم أتغير

من النهاردة دى بلدك انت ، تاريخك انت ، وطنك انت حافظ عليه ، مترميش زبالة ، ماتكسرش اشارة ، ماتدفعش رشوة ، ماتزورش ورقة

أنا بئا عندي أمل إن مصر هتكون أحسن وأحسن مع مرور الوقت إن شاء الله

كلنا هنتغير
جميلة جدا يا سارة