خطبة عرفة .. ويوم عرفة

الموضوع منقـــــــــــــــــول


وهو خطبة عرفة

كتير مننا بيطنش الخطبة و مش بيسمعها

خطبة عرفة مهمة جدا جدا و ضروري تسمعها

لأن خطيب عرفة ده هو الشخص الوحيد اللي من حقه يقول : أمة الاسلام

اي خطيب تاني مبيقولش غير ايها المسلمون

لأن خطيب عرفة بيوجه كلامه لسائر المسلمين في شتي بقاع الارض

و خطبة عرفة خطبة شاملة بيتناقش فيها كذا حاجة

ماهياش مجرد كلمتين حلوين بيتقالوا في الدين و شكرا

دي خطبة لامة الاسلام اللي انت منهم

اجتماع لوفود المسلمين اللي حضرت من كل مكان في الارض و لازم تكون حاضر معاهم و تسمع

حتي لو انت عارف هيتكلم عن ايه ، برضه اسمعها

لأنك عمرك ما هتلاقي كلام بيناقش قضية المسلمين في التوحيد و السياسة و الاراضي المحتلة و كل شئ مع بعضه الا في اللحظة دي

اسمع الخطبة كلها و اهو بالمرة بتملّي عينك بالملايين اللي قاعدة تستمع دي و تاخد من روحهم و تعيش قلبك معاهم

و بعد الخطبة ما تخلص تصلي الضهر في المسجد

الصلوات كلها في جماعة يا اخي

اليوم ده مينفعش فيه التقاعس عن اي شئ

حط في نيتك انك بتحج بقلبك طول الوقت

و مافيش حاج مش بيتحرك طول الوقت

افضل اتحرك و روح صلي في المساجد و كل ما تعوز ترتاح اقعد اصاد قنوات بث الحج

هتلاقي عدد كبير من مشايخنا ربنا يكرمهم بيدوا دروس في في هذه اللحظات

و بيدعوا كمان

فرصة متتعوضش أهي

ناس واقفة علي عرفات و بتدعي و انت بتأمّن وراهم

بصراحة مافيش حاجة احسن من كده بقي

و حاول تصلي المغرب بالله عليك في المسجد

و خد في ايدك كام تمرة كده فرقهم عالناس اللي ماشية زي ما كنت بتعمل في رمضان

ربنا ما يقطعلك عادة

و اخر وصية و اهم وصية

متوسخش صفحتك البيضا بعد ما فتحتها

متبقاش يوم عرفة محارب الشيطان و كاسر عينه بأعمالك الصالحة و تيجي تاني يوم في العيد تبوس ايده

عيب و الله تبقي كده

يوم عرفة هو اكتر يوم الشيطان بيكون حقير و صغير و ناقص فيه كما قال الرسول

ليه تحسس الشيطان بالعزة بعد ما ربنا ذله عشانك ؟؟؟

خلي عرفات يوم ولادة بني آدم جديد

بلاش تخليه يوم ارتداء للبس جديد و خلعته بعد ما اليوم خلص

قال رسول الله

يوم عرفة لمن ملك سمعه و بصره

الكسبان في عرفة هو اللي عرف يمسك ودانه و عينيه و اكيد باقي جوارحه عن الحرام

و ياما لقينا كتير من اخواننا اللي عملوا من الصالحات ما عملوا و في الاخر بعد ما عملوا كل ده طيروا ثوابه بكلام فارغ مالوش لازمة

اياك اياك و التحالف مع الشيطان في يوم عرفه او بعده

ربنا اراد المذلة للشيطان

فبلاش انت تحاول تعززه لأنك هتبقي بكده اردت مالم يرده الله و خرجت عن حزب الله

فاحرص علي عرفة و اغتنمه فانت لا تدري كم عرفة قد بقي لك

وربنا يتقبل منا ومنك و من كل المسلمين صالح الاعمال و يوفقنا جميعا لما يحبه و يرضاه