حلايب وشلاتين .. مأساة !

بعد رحلة دامت يومين .. خلصنا امبارح بفضل الله استكشاف بعض الاسر الفقيرة فى اقصى جنوب مصر..شلاتين المنسية والقرى المحيطة بها

بعد 20 ساعة سفر

نزلنا فى شلاتين فى فندق ضعيف المستوى

ملحوظةالمنطقة اللى نزلنا فيها فى شلاتين مستواها المعيشى اعلى مستوى فى شلاتين كلها وهيا عبارة عن شارع وديه المنطقة الوحيدة اللى متوصل فيها ميا وكهربا وصرف صحى وفيها مطعم وصيدليتين تقريباً ومستشفى واحدة فى شلاتين كلها)



اليوم الاول..استكشاف القرى المحيطة بشلاتين



اول قرية انا نزلتها كانت اسمها العلياب وديه مستواها المعيشى منعدم..مفيش ميا..مفيش كهربا..مفيش مدرسة..مفيش صرف صحى..مفيهاش رعاية صحية..مفيهاش غير كشك صغير,والبيوت هناك عبارة عن عشش بعضها مصنوع من الواح خشب مكسر او قطع كبيرة من حديد ضعيف بيتأكل فى الشمس او رقع قماش




مثال 1 للبيوت اللى هناك






مشكلة الميا:الناس هناك كل واحد معاه خزان او خزانين بيستنى عربية ميا بتيجى كل اسبوعين بتملاله الميا..وكمان على كلام الاسر الخزانات بتخلص فى 3 او 4 ايام واما بتخلص بيستلفوا من بعض الميا لحد ما الاسبوعين يخلصوا وعربية الميا تيجى ده غير ان فيه اسر كتير بتعانى من الخزانات لانها بتبوظ بسرعة من الشمس وبيبقى صعب يشتروا خزان لانه غالى


مشكلة الكهربا:فيه حتت قليلة جداً فيها مولدات كهربا بتوصل لعدد قليل جداً من البيوت والباقى شغال على الحطب والنار



مولد من مولدات الكهرباء



مشكلة الصرف الصحى والحمامات:الحمامات كلها مشتركة,بين كل عشر بيوت حمام عبارة عن اوضة متر فى متر وحفرة صغيرة فى الرمل وخلاص عشان مفيش مواسير صرف صحى



بالنسبة للمهن السائدة هناك فهى مهنة السواقة ورعى الاغنام او ارزقية بيشتغلوا اى حاجة باليومية..ونسبة الطلاق هناك كبيييييييييييييييرة جداً والمطلقات بياخدوا معاش شهرى حوالى 120 جنيه تقريباً


مشكلة المدارس والتعليم: الاطفال هناك بيتعلموا فى الكُتاب بيسموه "الخلوة" بيتعلموا فيها القرأة والكتابة والقرأن الكريم والتعليم بيكون على الخشب !!!!!!




مشكلة الصحة: فيه مستشفى واحدة بس فى شلاتين كلها .. المستشفى ديه مفيهاش غير 2 دكاترة انتداب وهيمشوا الشهر الجاى..واصلاً احياناً بيكونوا موجودين فى المستشفى واحياناً لأ..ولما حد بيعمل حادثة بيحولوه على مستشفى مرسى علم ومرسى علم بتحوله على مستشفى القصير والقصير بتحوله على مستشفى الغردقة والغردقة بتحوله على القاهرة..مع العلم ان المسافة ما بين كل بلد وبلد من دول 300 كيلو يعنى اصلاً عقبال ما يوصل مرسى علم بيكون مات.. وفى الغالب كل الحالات اللى بتتحول بتموت



لسة من حوالى 5 ايام كان فيه حالة ولادة متعثرة لبنت فى العشرينات ودوها المستشفى مكنش فيه غير دكتور واحد..البنت ماتت





الكلام ده كله بالنسبة لشلاتين ..وكل القرى اللى فى شلاتين نفس الكلام اللى كتبته مش شلاتين بس



_____________



ابرق وعصور ما قبل التاريخ



خلصنا استكشاف شلاتين وما حولها اول يوم تانى يوم اللى هو امبارح نزلنا قرية اسمها ابرق تبعد عن شلاتين ب220 كيلو.. 160 كيلو من شلاتين لحد حتة اسمها "الجاهلية" ومن الجاهلية 60 كيلو جوا الصحرا لحد ابرق اول 30 كيلو الارض متسفلتة وال30 كيلو التانيين فى طريق اسمه المدك طريق صعب جداً ومن صعوبته بياخد ساعتين بالعربية..وصلنا ابرق



برضه مفيش ميا متوصلة ليهم..مفيش كهربا .. مفيش مستشفى ..مفيش مدرسة..مفيش اى حاجة



البيوت هناك عبارة عن عشش اغلبها صغير جداً مصنوعة من القماش او الطين او طوب لبن او من اخشاب متكسرة




بيجيبوا الميا من ابار وعيون عايشين جنبها وبياكلوا لحوم الجمال او المعيز الجبلى اللى فى المكان اللى عايشين فيه ..وبالنسبة لمشكلة الكهربا فهما بيستعملوا الحطب والنار للإضاءة والطهى,بالنسبة للصحة فمفيش مستشفى خالص,اى حد بيمرض بيعالجوه بالاعشاب الطبيعية اللى موجودة عندهم فى الصحرا .. والمهنة الوحيدة الموجودة هيا مهنة الرعى..ومبيستخدموش فلوس خالص..ملهاش لازمة عندهم..عايشين على "المقايضات" عايز تشترى اى حاجة من حد بدلها معاه بفحم او اى مورد طبيعى متوفر عندك

_____________________



حلايب..ممنوع دخول حلايب الا بتصريح من المخابرات وللأسف معرفناش نطلع تصريح عشان نروح نستكشف الاسر اللى هناك مع العلم..حلايب اسوأ الف مرة من ابرق وشلاتين

...



كل اللى كتبته ده عن بلاد فى مصر..مصر اللى احنا عايشين فيها..فى 2012 لسة فيه ناس بتتعلم على الخشب..فى 2012 لسة فيه ناس بتستخدم الحطب عشان تعرف تاكل وتشرب وتعيش



يا ترى بعد ما عرفنا الكلام ده هنتضايق شوية لوجود ناس بالحال ديه وبعد كده ننساهم؟؟



ياريت كل اللى فى ايده اى حاجة يقدر يعملها للناس ديه يعملها

مأسااااااااااااااااااااااااااااااااااااااااااة أن يكون هناك قرى بهذا الشكل في مصر في عام 2012 !!!!!!!!!!!
ويوجد غيرهم الكثيييييييييييير والكثييييييييييير !!
مطلوب من رئيس مصر القادم أياً كان أن يوفر لأهالي هذه القرى سبل العيش الكريم اللتي يستحقونها !!

اقتباس :

يا ترى بعد ما عرفنا الكلام ده هنتضايق شوية لوجود ناس بالحال ديه وبعد كده ننساهم؟؟

هل نكتفي بالدعاء؟؟!!
كيف نساهم كـ "زهور / شباب المستقبل " في حل هذه المشكلة؟؟
الموضوع مفتوح للحوار ، اقتراحاتكم مهمة

رأيي:
- علينا أولاً أن ننشر مثل هذه المواضيع بين الناس حتى لا تكون "حلايب وشلاتين" وغيرهما محل تجاهل الجميع -كما هما الآن- ، وإن شاء الله سيكون من بين الناس من يستطيع مساعدنهم

- علينا أن نهتم بتنمية معرفتنا بمثل هذه القضايا الهامة -فنحن الآن في مرحلة "إعداد" هاااااااااااااااامة للمستقبل - حتى نشارك في حل هذه المشكلات في المستقبل - فحينها إن شاء الله ستكون أعمارنا وقدراتنا مناسبة وصوتنا مسموع ! -

- علينا أن نبحث عن المشروعات الخيرية التي تحاول مساعدة هذه المناطق و المساهمة فيها ولو بأموال قليلة بالإضافة إلى نشرها في كل مكان حتى يتمكن الجميع من تقديم المساعدة

لي عودة إن شاء الله بعد البحث عن المشروعات الخيرية التي تقدم المساعدة

و اقتراحاتكم وآرائكم مهمة ، أتمنى ألا تبخلوا بها !
في انتظار تفاعلكم

أول حملة نبدأ بها :

حملية المليار جنيه للنهوض بالعشوائيات

"تقوم الحملة على حصر العشوائيات ومعرفة كم البطالة والأمية الموجودين بها، وهدفنا أولا محو الأمية من العشوائيات، ثانيا، توفير مساكن يوجد بها الكهرباء والماء والصرف الصحي لأهالي المناطق العشوائية، وثالثا، القضاء على البطالة عن طريق عمل مشاريع صغيرة بتلك المناطق".
وسوف نبدأ بمحافظات القاهرة والجيزة والإسكندرية وبورسعيد والمنيا".




موقف رائع ومحترم
جزاك الله خيراً

خبر متعلق:

المصدر موقع مصراوي

محمد صبحي يطلق حملة ''المليار جنيه'' للنهوض بالعشوائيات

حملة لجمع مليار جنيه، يراها الفنان محمد صبحي البداية للتخلص من كابوس اسمه العشوائيات في مصر، وذلك لتحقيق مجالات العدالة الاجتماعية التى نادت بها ثورة 25 يناير

وعقدت الدكتورة هند حنفى رئيس جامعة الإسكندرية الخميس اجتماعا مع الفنان محمد صبحى للتحاور حول إطلاق حملة المليار جنيه للنهوض بالعشوائيات ودور الشباب الجامعى فى تنفيذ هذا المشروع لتحقيق الأهداف المرجوة من المشروع للنهوض بالمجتمع من خلال رعاية هذا المشروع.

وتطرق صبحى ، خلال الاجتماع ، إلى أنه يهدف من وراء هذه الحملة التى أطلق عليها "عنوان معا لريادة مصر" إلى بناء بيئة نظيفة تتوافر فيها مياه الشرب النظيفة والصرف الصحى وتحقيق آدمية المواطن المصرى وإعطائه حقه فى العيش فى بيئة تخلو من الأمراض بالإضافة إلى توفير مساكن تصون له كرامته وتحفظ له حقوقه الأدبية .

شهد اللقاء حضور كل من نائب رئيس الجامعة لشئون التعليم والطلاب الدكتور رشدى زهران ونائب رئيس الجامعة لشئون الدراسات العليا والبحوث الدكتور عصام خميس ونائب رئيس الجامعة لشئون خدمة المجتمع وتنمية البيئة .